KNAPK: Saattuarniat tunitsiviillu eqqugaassapput

Saattuarniarnerup juulip qaammataa aallarnerfigalugu septembarip qeqqata tungaanut matoqqatinneqarnissaa naalakkersuisut aalajangiusimavaat.

Tamanna aalisartunik tunitsivinnillu eqquisorujussuussasoq, KNAPK-p siulittaasua Peter Olsen oqarpoq:

- KNAPK-p ilaasortai qaammatini pingasuni matoqqasussaatitaaneq ajorisimanngilaat akuersaarsimallugulu. Nuumminngaanniilli avannamut ukioq manna qaammatini pingasuni matoqqareersimanerata saniatigut juulip qaammataaniit matuneqassappat, taava katillugit qaammatini arfinillinni matoqqasoqartitsissaaq. Tamanna aalisartunut tunitsivinnullu eqquisussaassaaq, Peter Olsen oqarpoq.

Aalisartut siunissaq ungasinnerusoq isigalugu ataavartumik aningaasarsiorsinnaanissaat qulakkeerumallugu, piujuaannartitsinissarlu pingaartinneqarmat saattuarniartarnerup ukiumut qaammatini pingasuni matoqqatinneqartarnissaa naalakkersuisut aalajangiusimanninerminnut tunngavigaat.

Naallu KNAPK-p piujuaannartitsinissaq aamma pingaartikkaluaraa, saattuartassat ilaat avataasiortunut EU-mullu 500 tonsit 2007-miit atuutilersussamik tunniunneqarnerat uggorilluinnarpaat, oqarlutik sinerissap qanittuani aalisartut saattuartassat pisarineqarsinnaasut tamarmik atorfissaqartilluinnaraluaraat.

- KNAPK-p tungaaninngaanniit pingaartilluinnnarparput assagiarsoqartuaannarnissaa, piujuaannartitsisoqarnissaa. Unali akuersaarsinnaanngilarput: Avataasiortunut pisassat, EU-mullu 500 tonsit tamarluinnarmik atorfissartilluinnaraluarpagut. Taamaattumik avataasiortunut EU-mullu tunniunneqartartut atorfissaqartilluinnaraluarpagut, KNAPK-p siulittaasua Peter Olsen oqarpoq.