KNAPK: Saattuarniarneq unitseqinagu

juunip 15-at 2006 05:13

Saattuarniarnerup matugallarnissaanik aalajangernerup ingerlaannartumik atuutilersumik atorunnaarsinneqarnissaa, Kalaallit Nunaanni Aalisartut Piniartullu Kattuffianit, KNAPK-mit piumasarineqarpoq.

Nunatta Kitaata Avannaani januaarimiit marsip tungaanut saattuarniarneq unitsinneqartarmat, KNAPK isumaqarpoq, saattuarniarneq aasaanerani unitsinneqassagaluarpat, saattuarniat sakkortoorujussuarmik eqqorneqassasut, KNAPK tusagassiutinut allappoq.

KNAPK-p siulittaasua, Peter Olsen, aamma isumaqarpoq, saattuarniarnerup matuneqarallaarnissaa pillugu namminneq tusarniarneqarsimanatik.

Peter Olsen isumaqarpoq, Emanuel Rosing kukkusoq, KNR-TV-kkut Qanoruumut ippassaani oqarami, saattuarniarnerup unitsinneqarnissaa, Pinngortitaleriffimmi isumasioqatigiinnermi isumaqatigiissutaasimasoq.

KNAPK-p siulittaasua naapertorlugu, biologit piumasaannut malinninnissamut Royal Greenland kisimi isumaqataasimavoq. Ataatsimeeqataasut sinneri tassa akerliusimapput.

Saattuarniarnerulli ukiut tamaasa qaammatini pingasuni matuneqarallartarnissaa KNAPK-mit tunngaviusumik isumaqatigineqarpoq, tamassumali juunip ulluisa aallaqaataanniit juulip ulluisa 15-iata tungaanut pisarnissaa eqqarsaatigalugu, Paamiullu eqqaanni saattuarniarnerup ukiakkut ataasiarluni pisarnissaa aamma kaammattuutigalugu.