KNAPK: Saarulliit akii tapiiffigisariaqarput
KNAPK-ip siulittaasua Leif Fontaine ima oqarpoq:
- Ukiuni kingullerni saarulliit akii appasissorujussuupput. Tassunga tunngassuteqarpoq, Royal Greenland A/S-ip aningaasarliornera. Saarulliit akii aalisartutunut imminut akilersinnaanngitsumik ukiuni kingullerni inissisimasimapput, Leif Fontaine oqarpoq.
Aalisakkat akilunneri aalisartunut sunniuteqarnerluppoq, tamannalu KNAPK-mut saaffiginnissutigineqartuarpoq.
- Pingaartumik kangerlunni aalisartut aalisariutaatillillu inissisimanerat pitsaangitsorujussuuvoq. Aalisartut ilai akiliisinnaajunnaaqqajaallutik inissisimapput aamma siornatulli aalisarneq pitsaanngilaq, allaat ukioq manna ajornerusutut oqaatigisariaqarluni, Leif Fontaine oqarpoq.
Sinerissap qanittuani aalisartut saarullinnik tunisinerminnut atatillugu kiilumut 3,50 koruunit maanna pissarsiarisarpaat. Nunarsuarmi aningaasarliorneq atuukkaluartoq saarulliit akii pitsaanerusinnaasut, Leif Fontaine assersuutissaqarpoq.
- Islandimi saarulliit akii 3-4-iaammik annerupput, Norgekkunni aamma taamatorluinnaq akisunerugaatsiarput, naak nunarsuarmi saarulliit akiia appariarsimagaluartut. Kisianni nunatsinni kiilumut 3,50 kr. aalisartumut akilersinnaanngilaq, erseqqissaavoq.