KNAPK: Royal Greenland - torrallaanerusinnaavoq

Royal Greenland Paamiuni Qeqertarsuatsiaanilu suliassanik annertusaanermigut suliffinnik nutaanik 30-nik 40-nillu pilersitsisimanera KNAPK-imit nuannaarutigineqannginngilaq.
Allattoq Jaaku Lyberth
juunip 18-at 2012 07:39

KNAPK Qeqertarsuatsiaanut Paamiunullu angalavoq, Royal Greenlandip sulianik annertusaanera takuniarlugu, angalanermilu paasineqarpoq, Royal Greenland pilersaarusiorsimanera iluarinanngitsoq.

Qerititsiviit annertusarneqarneqarat ajunngikkaluarpoq, Paamiunilu saarullinnut tisaavimmik maskiinamik peqalersimanera, KNAPK-ip siulittaasua Leif Fontaine allappoq.

Royal Greenland ukioq nalunaaruteqarpoq, saarullinnik ullormut 30 tonsinik tigusaqarsinnaallutik, kisiannili ilumoortoq tassaavoq, ullormut 20 tons missaannik annertutigisumik tigusinnaapput.

Qeqertarsuatsiaani qerinasuartitsiviit marluk ikkussorneqarput saarullinnik tunisineq annertusarneqassammat, tamannali aamma naammanngilaq, saarullinnik tunisassiorneq aggustip qaammataata aallartisimalernerani aatsaat aallartinneqassammat.

- Aggutsip tungaanut aalisartut saarullinnik ullormut tonsinik marlunnik taamaallaat tunisisinnaapput.

 Aalisartutoqqat oqarnerat malillugu Qeqertarsuatsiaat eqqaanni aatsaat taamak saarulleqartigaaq, Leif Fontain oqarpoq.

Aalisartut saarullinnik tunisaat akikippallaamik  Royal Greenlandip akeqartippai tassalu kiilumut 5 koruunit  Islandimi kiilumut 14 kroneqartinneqartoq, KNAPK-ip siulittaasua Leif Fontaine oqarpoq.