KNAPK: Royal Greenland namminersortunngorsartariaqarpoq
Royal Greenland nunatta iluani aalisarnermik immikkoortortaqarfia kalaallinut aalisartunut ingerlatassanngorlugu tuneriaannaavaa tamannalu apeqquserneqanngitsoq KNAPK-p siulittaasua oqarpoq. Leif Fontainep Royal Greenlandip pisortaanerata Flemming Knudsenip akilersinnaanngitsut akilersinnaanngorteqqaarlugit aatsaat namminersortunngorsarneqartariaqarneranik oqarsimanera innersuussutigalugu tusagassiuutinut tamaatut nalunaaruteqarpoq.
Nunarsuarmi aalisakkat qaleruallillu avammut tunisassiarneqarnerannit, Kalaallit Nunaanni aalisartunut akit atortitaat allanut tamanut sanilliullugit nunatsinni appasinnerpaajusut tamannalu ukiormannamiit allanngortinneqartariaqarpoq, Leif Fontaine oqarpoq.
- Royal Greenlandip allanngortinneqarnissaanik Naalakkersuisut piaartumik qanoq iliuuseqartariaqartut Leif Fontaine oqarpoq.
Royal Greenland naalakkersuisunit siorna 500 millionit koruuninik tapiiffineqarpoq, ukiorlu naanngitsoq 200 millionit koruuninik pisariaqaritsisoq paasineqarluni. Royal Greenland amigartooruteqarluni ingerlatillugu namminersortunngorsarneqarnissaa akuerineqarsinnaanngitsoq, pisortaaneq Flemming Knudsen tallimanngormat radioaviisimut oqarpoq.
- Namminersortunngortinneqarpat, pisat tunineqartarnerisa akiisa qaffanneqarnissaanik kinguneqarnissa qularutigivaa, nunamili suliffissuit matoorarnissaannik kinguneqarnissaaanik ilimasuppoq, suliffissaaleqisullu amerliumaartut, Flemming Knudsen oqarpoq.