KNAPK raajat akii pillugit paasiniaaqqaassaaaq

Raajarniat raajanillu tunisassiortut, International coldwater Prawn Forum 2006 –imik taallugu ataatsimeersuarneranni, raajat nunarsuarmi akiisa pissarsiarinissaat KNAPK-mit neriuutigineqarpoq.

Ataatsimeersuarneq Londonimi novemberip 16-iani 17-ianilu ingerlanneqassaaq. Ukiullu allortarlugit ingerlanneqartarpoq.

Nillertup raajaasa akiinik paasiniaanissaq KNAPK-p siunniuppaa. Paasisallu tunngavigalugit KNAPK Royal Greenlandimut raajat akii pillugit novemberimi isumaqatiginninniartoqalerpat sakkussaqarnerussangavoq:

- Akinik paasisaqareerutta raajat akii pillugit isumaqatiginninniarnerit aallartissinnaalissavagut, KNAPK-mi siulittaasoq Peter Olsen qanoruumut oqarpoq.

Islandimit, Norgemit, Canadamit, Savalimmiunit Nunatsinniilu raajarniat, raajanillu tunisassiortut ataatsimeersuarnermi peqataatitaqassapput. Royal Greenland, KNAPK, Polar Seafood, Pinngortitaleriffillu aallartitaqassapput.

Sinerissami qanittumi raajarniat raajartaannut akigitinneqartoq Royal Greenlandip novemberip 15-ianiit atorunnaasippaa.

KNAPK-p tungaaniit maannamut paasisat malillugit nillertup raajaasa akii suli appartinneqarsimanngillat.