KNAPK qinersinermut atatillugu pilluaqqusivoq
Inatsisartunut qineqqusaarnerup nalaani oqariartuutimik tigulluarneqarnerat, KNAPK-p ilaatigut nuannaarutigaa, tamatumunngali atatillugu oqaatigalugu Inatsisartuni ilaasortanngortunut isumalluaramik.
- Ukiuni kingullerni arlaqalersuni naammassinaveeqqanikuusoq, tassalu Inatsisartut Aalisarnermut inatsisaat, naammassiniaqqullugu Inatsisartunut ilaasortanngortunut nutaanut kaammattuutigeqqissavarput, KNAPK-mit allapput.
- Isumaqarpugut sinerissamut qanittumi imaatigut inuussutissarsiornerup inuiaqatigiinnut aningaasarsiornikkut nalitusarnissaa ukiunut tulliuttunut sisamaannaanngitsunut, kisiannili suliap naammassineqarnissaata tungaanut isumatuumik, tatituumik siamasissumillu pisariaqartoq, siulittaasoq Henrik Sandgreen allappoq.
Suleqatigiilluarnissamik neriuuteqartoq
- Tamatumani pineqarlutik kalaallit nunaminni angerlarsimaffeqavillutik aalisartuusut inatsisiliornikkut salliutinneqarnissaat. Aamma sineriassuatsinni aalisagarpassuaqarnerata atorluarniarneqarnissaa atuisutut aqqutissiuusseqataaffiginissaat suleqataaffigerusupparput, Henrik Sandgreen allappoq.
- Inatsisartunngortut Naalakkersuisunngortussallu naatsorsuutigisinnaavaatigut.
- Nunatsinni aalisarnerup suli inuussutissarsiutini pingaarnerpaatut inissisimanera tunngavigalugu suleqataarusuppugut, KNAP-p siulittaasua taama naggasiivoq.