KNAPK: Qaleraleqarfiit qaleraleqarluarput
Pinngortitaleriffik aqutsiveqarfinni Qeqertarsuup Tunuani, Uummannami Upernavimmilu aappagu qaleralittassat amerlassusissaannik ullumi innersuussaqarpoq.
Uummanap eqqaani qalerallit ukioq manna 6.000 tonsit pisassiissutigineqarput. Biologillu ukioq mannamut innersuussutaat 5.000 tonsiupput. Biologillu ullumi innersuussuteqarput qaleralittassat 1.000 tonsinik siornarnit amerlanerussasut.
- Tamatuma takutiinnarpaa qalerallit tamaani ikiliartunngitsut, Tønnes Berthelsen oqarpoq, erseqqissallunilu pisassatut innersuussutigineqartut ajoriinnagassaanngitsutut pineqartariaqartut.
Qeqertarsuup Tunuani qaleralittassatut innersuussutigneqartut allannguuteqanngillat, ukioq mannatut 8.000 tonsiussallutik.
- Biologinit oqaatigineqarpoq qaleralinikkiartortoq ikiliartornerallu unissimalluni.Tamatumunngalu pissutaavoq aalisartut piujuaannartitsinissamik tunngaveqarlutik aalisartaramik, Tønnes Berthelsen erseqqissaavoq.
Aqutsiveqarfik Upernavimmi biologit innersuussipput aappagu 6.300 tonsit pisarineqarsinnaassasut. Bilogillu mianersortunnguamik innersuussaqarput, tamaani misissuinernit paasissutissat allanut sanilliullugit ikinnerummata, soorlu aamma qaleraleqassuseq qularnaavinngeqarsimanngitsoq.
- Upernaviup eqqaani aalisarfigineqarsinnaasoq isorartoorujussuuvoq. Aalisarfigineqarsinnaasut tamarmik misissuiffigineqarneq ajormata ilimagaarput suli amerlanerungaartunik qaleraleqassasoq, Tønnes Berthelsen oqarpoq. Isumaqarlunilu paasissutissanik amerlanernik katersuisoqalersimariaqarpat pisassiissutigineqartartut siunissami amerlaneqarsinnaassasut.
