KNAPK puisinniarnermik illersuiartorpoq

Taanna pillugu Bruxellesimi ullumi tusarniaasoqarmat, KNAPK-p akerliunini oqaatigiartorpaa, naak siunnersuummi puisit kalaallit inuillu pisaat pineqanngikkaluattut.

Puisit 900.000-it nunarsuaq tamakkerlugu ukiumut pisarineqartarput, taakkunannga 170.000-it 180.000-illu akornanni Nunatsinniinnaq. Puisilli amiinik tuniniaaneq ajornarsiartuinnarpoq, Danmarkimilu decembarip qiteqqunnerani akitsorterisoqarmat ataasiinnarluunniit tunineqanngilaq.

- Takoreerparput, eqqartuinnarneqarnera qanoq maannamut eqquinerlutsigisoq, piniartoq Leif Fontaine, KNAPK-p Bruxellesimut aallartitaa, oqarpoq. Taassuma saqqummiinermini ilanngullugu oqaatigaa, puisip neqaanik orsuanillu nerisaqarneq ”anaanap immuatulli” peqqinnartigisoq.

- Europamiut nunatsinni puisinik inuutissarsiuteqarneq innarlissappassuk, KNAPK-p EU inuit pisinnaatitaaffii pillugit eqqartuussivissuarmi unnerluutigissava, Leif Fontaine tusarniaanermi ilaatigut oqarpoq.

Siunnersuummik illersuisut tikkuarpaat, puisinik tunisassiat nalingi kalaallit avammut tunisaasa nalingisa 0,5 procentiinnarigaat, oqarpullu, kalaallit ingasattajaartut, kingunissaa sakkortussaneraramikku.

- Puisinik inuuniuteqarneq pingaartumik avinngarusimasuni sunniuteqaqaaq, Leif Fontaine oqarpoq.

Uumasunik illersuiniaqatigiit EU Parlamentimi tusarniaanermi siunnersuutigaat, piniartut puisit takornarianut takutiinnartassagaat, Leif Fontainelli eqqaasitsissutigaa, puisit neqaa nerisarisarput imaaliallaannarlugu taarsersinnaanngikkipput.