KNAPK pisortartaarpoq
Siulittaasup Leif Fontainep nalunaarutigaa, Petrus Biilmann februaarip aallaqaataanit KNAPK´mi allaffissornikkut pisortanngortoq, Niels Boassenip qaammatini kingullerni pingasuni pisortaagallartutut atorfigisimasaa.
KNAPK´mi pisortanngortoq Petrus Biilman, 1984-miilli aalisariutaatillit allafeqarfiini pisortatut sulisimavoq, soorlu Polar Seafoodimi direktøritut sulisimavoq, aamma Aalisanermut Piniarnermullu naalakkersuisoqarfimmi - aammalu avataasiortut kattuffianni APK´imi pisortatut sulisimalluni.
Niels Boassen KNAPK´mi siunnersortit pisortaattut atorfeqalerpoq, Leif Fontaine nalunaarpoq.
Alfred Jakobsen KNAPK´mi pisortatut suliunnaarsimanera decembarip qaammataani paasinarsimmat, KNAPK´p siulittaasua nalunaaruteqanngilaq, aamma suna pillugu suliunnaarsimanersoq oqaluttuarineqarani.
KNAPK´ip immikkoortortaqarfiini siulittaasup tulliata taamanikkut radioaviisimut oqaluttuaraa, Alfred Jakobsen soraarsinneqartoq, taassuma partiimut IA´mut attuumassuteqarnera pissutigalugu.
Petrus Biilmann KNAPK´mi pisortatut atorfinippoq, taassuma paarlataa Alfred Jakobsen ICC´mi pisortatut atorfinilluni.
Alfred Jakobsen ICC´mi pisortatut atorfininnermini ICC´ip qitiusumik allaffeqarfiani Nuummiittumi pisortatut atorfinitsinneqartoq, ICC´mit pisortatigoortumik ippassaq taamatut nalunaarutigineqarpoq.