KNAPK pisassat ikilinerannut akerliuvoq

juunip 23-at 2005 11:43

Aalisartut piniartullu kattuffiat KNAPK 2006-imi 2007-imilu tikaagulliusaartassat ukiumut 19-init qulinut appartinneqarnerannut akerliuvoq, naak Aalisarnermut Piniarnermullu Naalakkersuisoq Rasmus Frederiksen Arfanniartarneq Pillugu Nunat Tamalaat Kommissionianni Koreami ataatsimeersuarneranni ippassaq oqariartuuteqaraluartoq, ikililerinissamut aalajangertariaqalernermut KNAPK akuersaaginnartariaqarsimasoq.

- Taamaattoqanngilarli, KNAPK-p siulittaasua Peter Olsen erseqqissaavoq.

- Arfattassat ikilineqarnissaannut sunulluunnit akerliuvugut, tamanna naalakkersuisumut aamma apuupparput. Taamaattumik paasisinnaanngilara naalakkersuisup taama oqariartuuteqarnera, soorunami ikililerinermut akerliuvugut. Peter Olsen oqarpoq.

Ukiut siuliini tikaagulliusaartassat ukiumut qulit missaanniittut taamaallaat pisarineqartarsimapput, ikililerineq pissusissamisuuginnannginnerluni ?

- Arfanniarnermi sila aamma apeqqutaasarpoq, taamaalilluni pisarineqartartut tamakkerneqanngitsoorsinnaasarlutik. Taamaattumik pisassanik sunilluunnit ikililerinissaq atuisunut annertuumik eqquisarput, aningaasarsiorneq eqqarsaatigalugu. Peter Olsen.

Aamma oqarpoq, suliassaq tullinnguuttoq tassaasoq, arfernik kisitseriaatsit pitsanngortinneqarnissaat siunertalugu naalakkersuisumik oqaloqateqarnissaq.