KNAPK: Piniartuuneq katersugaasivimmiittussiaanngilaq

Kalaallit Nunaanni Aalisartut Piniartullu Kattuffianit oqaaseriumasat amerlaqaat, saqqummiussallu piniarnermik kulturip qanoq kalaallinut pingaaruteqartigineranik imaqarput.

- Piniartuuneq katersugaasivimmiittussiaanngilaq, tamannaana nunasiaateqartut nutaat pinngortitamillu alianaatsuutitsiniat anguniarunaraat. Piniartuuneq modernimik inuuleraluarluta kulturitsinnut ilaalluinnarpoq, seqinerlu Kitaanut tarrittartillugu piniartoqartuassaaq, Leif Fontaine ilaatigut oqarpoq.

Piniarneq pillugu ataatsimeersuarnermi, puisit arferillu ilumut nungusaataanngitsumik naalliutsitsinerunngitsumillu piniarneqartarnersut oqallisigineqarpoq. KNAPK-p siulittaasua saqqummiussani naalivillugu ima appisaluussivoq:

- Europami allanilu modernimik inuusuni uumasuutit millionilikkaat paarilluarneqanngitsut toquinnartariaqartakkat tusartuarpavut. Tassa nungusaataanngitsumik ingerlatsineq? EU-mi inuussutissat tonserpassuit ukiut tamarluinnaasa eqqaannarneqartarput, nunarsuup ilaani inuit uffa perlerartut. Tassa nungusaataanngitsumik ingerlatsineq? Danmarkimi EU-miillu inuussutissalerinermut ukiumut 300 milliardi koruuninik tapiisoqartartoq, Danmarkimi Naatsorsueqqissaartarfiup kisitsisaataasa takutippaat. Naasorissaanermut uumasuuteqarnermullu tapiissutit. Tassa nungusaataanngitsumik ingerlatsineq?

Leif Fontainellu apeqqutini sakkortunerusumik ima nangippai:

- Nunat killiit moderninngungaaramik, ima ajorsartigilerput, allaat inuussutissalioriaasiat nunarsuarmi silap kiatsikkiartorneranik kinguneqarluni, pinngortitamut navianartorsiortitsisumik.

Folketingimi Atlantikup Avannaani Suleqatigiivisa ullumi nalunaarutigaat, pingasunngormat ataatsimeersuarneq nangillugu nunat tamalaat peqataaffigisaannik ataatsimeersuartitseqqissallutik.