KNAPK-p siunnersuutai ataasiinnarmut sammivallaaqaat
Aalisarnermut siunnersortip Frans Heilmannip sinerissamut qanittumi aalisartut aningaasarsiornikkut ajornartorsiornerat pillugu oqallinneq akuliuffigaa. Taanna isumaqarpoq, KNAPK-p aaqqiissutissatut siunnersuutai sammisamut ataatsimut sammivallaartut.
- Isumaqarpunga taamatut saqqummiisarneq, siullermeerlugu takunngikkipput. Taamaattumik isumaqarpunga piffissanngortoq, aalisarnermut inatsisissap oqallisigineqalernerata nalaani aaqqiissutissamik suli silinnerusumik eqqartuisoqassasoq aamma KNAPK-p politikerillu tungaaninngaanniit.
- Isumaqarpunga aaqqiissutissat aningaasartaqanngitsut neriuppunga annertunerusumik ujartorneqassasut, imaanngitsoq aningaasaleeqqaartoqarnissaa, tassami sorpassuit aningaasaleeqqaanngikkaluarluni aaqqiiffigineqarsinnaapput, taamaalilluni akileraartartut annikinnerusumik aningaasaliinissaat anguniarlugu. Tassami sinerissamut qanittumi aalisarnermi tunngaviusumik ajornartorsiutit tassaammata ineriartortitsinissamut aningaasaliissutissat aamma ulluinnarni ingerlatsinermi aningaasat atorneqartartut, massakkut qularnartorujussuarmik inissisimasut. Taamaattumik pisassiissutit qulakkeerniarneqassappata pisassiissutit nalillit, massakkut qularnartorujussuarmik inissisimasut, eqqunniarneqarnissaat ammasumik eqqartorneqartariaqarpoq.
Ilaatigut allapputit sinerissamut qanittumi aalisartunut angallammi tunisassiorneq eqqunneqarsinnaasoq?
Tassa tamakkua pisassiissutit nalillit eqqunneqaraluarpata taavalu sinerissamut qanittumi aalisartunut pisassiisarneq eqqunneqaraluarpat, taava aamma tamakku aalisarnermut inatsimmi ilanngunneqarsinnaapput, oqarluni aaqqiissutissat tamakkua akunnerminni nammineerlutik iluarsartuutissagaat, apeqqutaalluni sutigut aamma qanoq iliorluni akikinnerpaassanersoq aamma akilersinnaassanersoq.
Imaassinnaavoq nunami suliffissuit ammaannarsinnaasut, kisianni taamaattoqassappat sinerissamut qanittumi aalisartut nukittunerujussuarmik inissisimassapput, oqaannarsinnaanngortussaassagamik ilissi akikitsitsivallaarassi, uagut nammineerluta avammut tunisassiorusuppugut. Taamaalilluta pisarisartakkavut annerusumik pissarsissutigisinnaaniassagatsigik, Frans Heilmann naggasiivoq.
