KNAPK-p siulittaasuata siunnersuisoqatigiit saassukkaa: Politikkikkut qisuariartoqartariaqarpoq

Aalisartut ikiorserneqassanngitsut aningaasaqarnermut siunnersuisoqatigiit naliliivoq. Taamatullu naliliineq KNAPK-mit isumaqatigineqanngilluinnarpoq.
- Maannakkut takornariaqarnermi aamma nunatta iluani angallassinermi assigiinngitsuni takusinnaavagut ikiorsiissutinik allatuulli pigisaqartutut qanoq annertutigisumik aamma maannakkut aningaasanik isaatitsillutik ingerlasut. Taakkua minnerpaannguamilluunniit qiviarneqanngillat, taamaammat ataqatigiinngitsorujussuuvoq uani iliuuserineqartoq. Assi © : KNR
septembarip 23-at 2020 15:24

Naalakkersuisut aningaasaqarnermut siunnersuisoqatigiit siulittaasoqarfiat apeqqusertariaqarpaat.

KNAP-mi siulittaasoq, Henrik Sandgreen taama isumaqarpoq.

- Taamatut eqqarsarneq inuiaqatigiit katitigaanitsinnut naapertuutinngilluinnarpoq.

Ilami allaat immaqami aamma naalakkersuisut aningaasarsiornermut siunnersortit formandskabiata inuttalersorneqarnera immaqa aamma ilanngullugu nalilersortariaqalerpaat ,

Henrik Sandgreen KNR-imut taama oqarpoq.

AAMMA ATUARUK Aningaasaqarnermut siunnersuisoqatigiit: Aalisartut ikiorsertariaqanngillat

Aalisartut ikiorserneqannginnissaannik, aningaasaqarnermut siunnersuisoqatigiit oqariartuuteqarneranut tunngatillugu, taama sakkortutigisumik qisuariaateqarpoq.

Aalisartut saarulliit raajallu akii apparnerat suaartaatiginikuuaat, ikiorsiissutissallu sivitsortumi isumaqatigiinniutigineqarput.

Isummat assigiinngitsut

Kisianni taamaaliornikkut annaasaqaratarsinnaaneq aalisartuniit nunatta karsianut nuunneqassasoq, siunnersuisoqatigiit siulittaasuat, Torben M. Andersen isumaqarpoq.

Akit appangaatsiarnerat nunarsuup annersaani Covid-19-ip tuniluunneranut toqqaannartumik atassuteqarput, tamannami neriniartarfinnut neriartortarnitta ikilingaatsiarneranik kinguneqarpoq.

 

Raajat saarulliillu akii pingaartumik apparsimasut, naatsorsueqqissaartarfimmit 2020-mi januaarimiit juulimut aalisakkat avammut tunisaanerannik nalunaarusiami allassimavoq.

 

Kiilumut akii ima appartigaat

 

Aalisakkat pingaarnerit kiilumut akii ukioq manna qaammatit siulliit arfinillit ingerlaneranni siorna piffissamut tassunga sanilliullugit appariarput.
 

  • Raajat kiilumut akii 11,3 procentimik apparput.
  • Saarulliit kiilumut akii 10,1 procentimik apparput.
  • Qalerallit kiilumut akii 6,1 procentimik apparput.

 

Avammut tunisat nalingi ukioq manna januaarimiit juulimut siorna piffissamut tassunga sanilliullugit 129 millionit koruuninik apparsimasut, Nunatta naatsorsueqqissaartarfianit kisitsisit nutaat takutippaat. Tamanna 4,7 procentimik appariarnerup assigaa.

 

Tusarfik: Naatsorsueqqissaartarfik

Taanna KNR-imut oqaqqammerpoq, aalisakkat akii nunarsuarmi niuffafinni maannakkutulli nikerartuaannartuusut. Aalisartulli coronamit assartuussisutulli aamma takornariartitsisartutulli, ukiup aallartisimalernerani matusinermit eqqugaasutut, eqqorneqartiginngitsut.

Taamatullu oqariartuuteqarneq KNAPK-p isumaqatiginngilluinnarpaa.

Henrik Sandgreenip oqarnera naapertorlugu aalisakkat akiisa apparnerat kisimi ajornartorsiutaanngilaq, pisiniarfiimmi allalu uani aamma coronamit eqqugaammata, aalisarnermi tunisisarneq killeqarnerulerpoq.

- Aalisarnermi unammillernermik ingerlatsisoqalersimavoq, aammalu akkitsuutitigut aningaasartuutinik annertoorujussuarmik ikkussuisoqarnikuuvoq.

- Maannakkut takornariaqarnermi aamma nunatta iluani angallassinermi assigiinngitsuni takusinnaavagut ikiorsiissutinik allatuulli pigisaqartutut qanoq annertutigisumik aamma maannakkut aningaasanik isaatitsillutik ingerlasut. Taakkua minnerpaannguamilluunniit qiviarneqanngillat, taamaammat ataqatigiinngitsorujussuuvoq uani iliuuserineqartoq.

AAMMA ATUARUK Aalisarnermut ikiorsiissuteqalerpoq - ikiorsiissutilli qanoq ittuussanersut suli ilisimaneqanngilaq

Naalakkersuisut aalisartunut ikiorsiissutissiiniarlutik septembarip 14-iani saqqummiipput. Isumaqatigiissutissalli qanoq ilusilersorneqarnissaannut ilaatigut KNAPK allallu suli isumaqatiginiarneqarput.

Jens Frederik Nielsen, ikioorsiissutissat pillugit maanna isumaqatigiinniaqataaleruttortoq, KNR-ip apersornissaanik isumaqatigiissuteqarfigigaluarpaa.

Apersuinissarli nassuiaatissartaqanngitsumik taassuma taamaatippaa.