KNAPK-p RG-llu qalerallit akii atsioqatigiissutigaat

KNAPK Royal Greenlandilu qalerallit akii pillugit Ilulissani ullumi isumaqatigiissummik atsioqatigiipput.

Janus Maqe atsioqatigiinnermi peqataavoq.

Peter Olsen aperaarput qalerallit anginerit 10 kr. 20 øreqalernerat minnerillu 6 kr. 15 øreqalernerat qanoq igineraa.

- RG-p KNAPK-llu akornanni silaannaq assorsuaq pitsanngorsimavoq isumaqatigiinniarnerput assut nuannersumik ingerlavoq, oqarpoq.

Erseqqissaavorli piumasarisimagaluaritsik angissutsit tamarmik assigiimmik akeqartinneqassasut tamannali pisinnaasimanngitsoq.

Qalerallit anginerit akii 40 øremik qaffariarput mikinerillu 25 øremik qaffariarlutik.

Taamatuttaaq isumaqatigiissummi bonusit pioreersut saniatigut immikkut bonusiliisoqarpoq. Taannalu decembarimi atuutilersinneqassasoq Peter Olsenip oqaatigaa.

- Taassuma saniatigut RG qaammarsaanermut ukiumut 500.000-eertalissaaq tassa angallatit atortullu aningaasartuutigineqarnerinut qaammarsaasoqartalissaaq, nassuiaavoq.

Paaviaaraq Heilmann aperaarput tamanna RG-mut qanoq sunniuteqassanersoq.

- Nammassinnaavarput, aningaasaqarnitsinnut soorunami akiliinerulissaagut illuatungeriillutali isumaqatigiinniarpugut tamatta piumasaqaatigisatsinninngaanniit allaanerusumik tamatta angusaqarpugut tamannali takornartaanngilaq, ataatsimut isigalugu ajunngitsumik angusaqarpugut,

Royal Greenlandip siulersuisuisa siulittaasuat Paaviaaraq Heilmann taama oqarpoq.