KNAPK-p RG-illu isumaqatiginninniarnerat naalakkersuisunut tunniunneqartussanngorpoq

apriilip 03-at 2006 14:50

KNAPK-p Royal Greenlandillu raajat akii pillugit isumaqatiginninniarnerat naalakkersuisunut maanna tunniunneqartussanngorpoq.

Royal Greenland raajat akiinik pitsaanerusumik neqeroorutissaqanngippat KNAPK naalakkersuisunut saaffiginnissuteqarniarlutik ulloqeqqanut radioaviisimi oqarput. Royal Greenlandimiilli aalajangiineq allanngortinniarneqanngilaq, maannalu tusagassiutinut nalunaaruteqarput raajat akiinik aalajangersaasimallutik, akigitiligaallu KNAPK-mut kingullermik nalunaarutigisatik taamaalillutik pisortatigoortumik atuutilersillugit.

Royal Greenlandimi pisortaq Henrik Leth oqarpoq, aalisartut tuniserusuttut tusiumaartut, namminnerlu isumaqatiginninniarnermi ingerlariaqqinnissaminnut periarfissaqannginnamik aalajangersaasimallutik.

-Akigitinniakkagut piffissami matumani qaffannikorujussuuvagut. Akit atuutilersitagut decembarimi akit annertoqatigiinnarpaat, taamanilu KNAPK-p akit akuerinikuuaat. Nunarsuarmi niuerneq pitsanngoriarnikuunngiivippoq, taamaammat takorlooruminaatsippara qanoq ililluta nikeriaqqissanerluta, Henrik Leth oqarpoq, nangipporlu:

-KNAPK isumaqatiginninnissaminut piumassuseqanngiivippoq, taamaallaat naalakkiiniarsaripput qanoq akeqartitsissanersugut, Henrik Leth oqarpoq.

Aalisarnermut naalakkersuisup Finn Karlsen-ip paasisinnaanerarluarpaa KNAPK-mit maanna naalakkersuisunut saaffiginninniartoqalermat, politikkikkullu iliuuseqartoqarnissaa tunuarsimaarfiginagu aamma oqarluni.

-Allaassagaluarpoq isumaqatiginninniartut imminnut attaveqarfigiinnarsimasuuppata. Akerleriinnerli maanna sivitsorpoq, tamannalu aalisartunut suliffissuarnilu sulisunut, inuiaqatigiinnullumi akisoorujussuanngorsinnaavoq, Finn Karlsen oqarpoq.

Finn Karlsen KNAPK-mit saaffigineqaruni naalakkersuisut siulittaasuat Hans Enoksen aningaasaqarnermullu naalakkersuisoq Josef Motzfeldt piaartumik attaveqarfiginiarpai, periarfissanillu ujartueqatigalugit.

KNAPK-p naalakkersuisunut saaffiginninniarnerat Henrik Lethip oqaaseqarfigerusunngilaa.

KNAPK-p akit piumasarisaat ullut 14-it matuma siorna piumasarisaattut iinnarput, tassa Royal Greenlandip raajat ukiumut 200 millioni koruuninik nalinginut pisissutigisartagaat 215 millioni koruuninut qaffatsinneqarnissaat piumasarigamikku.