KNAPK-p nannuttassat saaffiginnissutigai

Nanortallip Kommuniani piniartut 15-inik nannuttassinneqarnissaminnik kissaataat aallaavigalugu, Aalisarnermut Piniarnermullu Pisortaqarfimmut KNAPK kingumut piumasaqaqqippoq nannuttassat 150-iunatik 200-ussasut, KNAPK-p siulittaasua Peter Olsen nassuiaavoq.

Nannuttassiissutinit 150-usunit Nanortallip Kommunianut marluinnaat tunniunneqarput, naak siunnersuutigisimagaluaraat Upernavimmut 50-it tuniunniarneqartussatut aalajangerniakkat 35-nut ikilillugit namminneq 15-nik pisassinneqarnissartik.

Peter Olsen-ip neriuutiginerarpaa Aalisarnermut Piniarnermullu Pisortaqarfimmit nannuttassanik amerlassusiliineq allanngortinneqarumaartoq.

Piniarnermut Siunnersuisoqatigiit sunniuteqangaarsimanngillat pisassiisoqarnerani?

- Aap, Piniarnermut Pisortaqarfimminngaanniit aallaqqaammulli isumartik pigisimavaat naggatissaa tikillugu. Tassa imappoq tusarniakkamik isumaat tusaajumasimanngilaat, namminnerlu aaliangernertik aallaqqaataaniit naggatissaa tikillugu pigisimavaat.

KNAPK-p Piniarnermut Siunnersuisoqatigiinni ilaasortaatitai Kali Mølgård Qeqertarsuarmiit Kangaamiuniillu Eifram Olsen allakkatigut Aalisarnermut Pinianermullu Naalakkersuisumut Finn Karlsen-imut pingasunngormat marsip aallaqqaataani allakkatigut naammagittaalliutinik pineqartoq pillugu allagaqarputtaaq.