KNAPK-p naalakkersuisunit akineqarnissani piumasaraa

Royal Greenlandip Qeqertaq Fishimi piginneqataassutinik amerlanerussuteqalernera narrutsaatigineqartuarsinnarpoq. Aalisartut piniartullu kattuffiat KNAPK maanna sakkortuumik piumasaqaateqarpoq. Siulittaasup Leif Fontainep naalakkersuisut Royal Greenlandip pisisimanera tapersernerlugu akissuteqaqquai.
decembarip 06-at 2012 11:32

Inatsisartuni partiit tamarmiullutik 2009-mi qinersineq sioqqullugu namminersorlutik oqartussat suliffeqarfiutaasa namminersortunngorsarneqarnissaannik oqariartuuteqarput. Tamanna Royal Greenlandip Qeqertaq Fishimi piginneqataassutinik pisiortorneranut naapertuutinngilluinnarpoq, killormorluinnarmi pisoqarpoq.

-KNAPK isumaqarpoq Royal Greenlandimi pisortaqatigiit Qeqertaq Fishimi piginnittuunerup 58%-iinik pisinissamik aalajangernerat akuerinerlugu Naalakkersuisut piginnittut sinnerlugit oqariartuutigisariaqaraat. Taamatut aalajangiisoqarsimanera tapersersorunikku taava taamaaliornikkut unammilleqatigiinnerup annikillisarnissaa tunisinermilu akit appariarnissaat, aalisartullu atugaasa malunnaatilimmik ajorseriarnissaat peqataaffigissallugu eqqaamasariaqarpaat. Akit appasinnerusut kingunerisassaasa ilaat alla tassaavoq aalisartut kaaviaartitatik attatiinnarniarlugit pisassiissutinik amerlanerusunik piumasaqaateqarnissaat, taamaattumillu Naalakkersuisut naatsorsuutigisariaqarpaat siunissami pisassiissutinik qaffaanissamik qinnuteqaatit amerlanerusut tigusalissallugit, Leif Fontaine naqissusiivoq.

KNAPK-p tungaanit erseqqissaatigineqarpoq qaleralinnik tunisinermi aki sumiiffinni unammilleqatigiiffiusuni sumiiffinnut Royal Greenlandip kisermaassiusattutut inissisimaffiinit marloriaammik qaffasinnerummata. Halibut Greenlandip namminersortutut niuerfimmut appakaannerata kingorna Qeqertarsuup tunuani akit marloriaatinngorsimapput. KNAPK siunissamut qularnaarisussamik aaqqiissutissaqarpoq, taassumalu atornissaanut politikerit tikilluaqqusaakutsoorput.

KNAPK-mit naqissuserneqarpoq kattuffiup kissaatigilluinnarmagu aalisakkanik  nioqqutissiorneq unammilleqatigiinnermik aallaaveqassasoq. Unammileqatigiinnerup ingerlaannarnissaa qulakkeerumallugu KNAPK imatut siunnersuuteqarpoq; inuiaqatigiit aqutaannik akit minnerpaaffeqarlutillu AAMMALI annerpaaffeqarnissaat suliarineqartassasoq. Kingulleq nutaajuvoq. Takorloorparput annerpaaffilernissaat nunarsuarmi qalerallit akiisa niuffassutaanerat aallaavigalugu inissinneqartassasoq. Taamatut iliornikkut suliffeqarfik Royal Greenlanditut ittup ipisitsisinnaanera unitsinneqassaaq, Leif Fontaine isumaqarpoq.