KNAPK nutaamik siulittaasortaarpoq

Kalaallit Nunaanni Aalisartut Piniartullu Kattuffiat nutaamik siulittaasortaarpoq, siulittaasunngorporlu 41-nik ukiulik Sisimiormiu saattuarniarnermik inuussutissarsiutilik Peter Olsen.

Kalaallit Nunaanni Aalisartut Piniartullu Kattuffiat Ilulissani ulluni kingullerni ataatsimeersuarpoq, ualeq mannalu siulittaasunngorniuttoqarmat qinigassanngortittut marluk naligiillualaavissimapput.

Siulittaasumut qinigassanngortittut marluusimapput, tassaallutik ukiuni kingullerni siulittaasuusimasoq Leif Fontaine unammillertigalugu 41-nik ukiulik Sisimiormiu saattuarniarnermik inuussutissarsiutik Peter Olsen. Siulittaasunngorniunnermi Leif Fontaine 13-inik taaneqarpoq, unammillertaa Peter Olsen 15-inik taaneqarluni ajugaasoq.

- Piniartut atugaat ukiuni kingullerni imaannaanngeqisut taamatuttaaq aalisakkat akii ullumikkut apparsimaqisut isumaqatigiinniutigineqartarnerat pisinnaasara tamaat sulissutigissavakka. Siulittaasunngortoq Peter Olsen oqarpoq.

Erseqqissaavoq, siulittaasuusimasup Leif Fontainep ukiuni kingullerni sisamani suliarisimasai toqqaannartumik assuarinagit, kisiannili aalisakkat akii appariartornerat nuannarisimanagu.

- Suliassat pingaarnerit ilagissavaat, assersuutigalugu saattuartassanik EU-p 1.000 tonsinik pisassinneqartarneranut tunngasoq, isumaqatigiinniarnissanut tullerni EU-mut tunniunnagit kalaallinut tunniunneqarnissaat sulissutigissavara. Kalaallit saattuarniartut ilaat ullumikkut killilersuineq tunngavigalugu eqqorneqarmata siunissami naammattumik pisassinneqarnissaat sulissutiginiarpara. Peter Olsen erseqqissaavoq.

Ukiuni kingullerni siulittaasuusimasoq Leif Fontaine siulittaasumut qinigaanngitsoornini pillugu ima oqarpoq:

- Pakatsinngilanga aamma isumaqarpunga suliniutigisimasavut annertunerusumik isorineqarsimanngitsut – taama nipilimmik tusagaqanngilavut. Uani amerlanerussuteqartut aalajangernerat soorunami ataqqivara. Leif Fontaine nassuiaavoq.

KNAPK-mi siulittaasutut tunuartoq Leif Fontaine Sisimiunut utissaaq, saattuarniarnermillu inuussutissarsiornini nangeqqissallugu, taassuma saniatigut KNAPK-mi siulersuisuni ilaasortanngorpoq ulluinnarnilu aqutsisuni ilanngulluni.

KNAPK-mi siulittaasunngortoq Peter Olsen qitiusumik allaffeqarfimmut Nuummiittumut nuussanerluni suli aalajangiutinngilaa, pisariaqassappalli nuunnissaminut piareersimanerarpoq. Isak Reimer siulittaasup tulliatut taarserlugu Qeqertarsuarmiu Kali Mølgaard siulittaasup tulliatut inissippoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat