KNAPK nungusaataanngitsumik arfanniartalernissaq taperserpaa

Piujuartitsinissamik tunngaveqarluni aningaasannanniutigalugu arfanniartalernissaq nunat tamalaat arfanniarneq pillugu ataatsimiitsitaliarsuani IWC-mi, Danmarkip siulittaasuutitaqarnermini junimi ataatsimiinissami siunnersuutiginiagaa, KNAPK-mit tapersersorneqarpoq. Qanorli nunarsuarmioqatigiit paasitinniarneqassanersut siunnersuuteqanngilaq.

Nunat tamalaat arfanniarneq pillugu ataatsimiitsitaliarsuani Danmark massakkut siulittaasuutitaqarpoq. Tamannalu iluatsillugu iluanaarniutigalugu arfanniartarnerup 1986-mi unitsinneqarsimasup piujuartitsinissaq tunngavigalugu arfanniartarnermik taallugu ingerlateqqilernissaanik siunnersuut IWC-p junimi Koreami ataatsimeersuarnissaani siunnersuutigineqassamaarpoq. Siunnersuuteqassamaarneq tapersersorluinnaritsik nunatsinni aalisartut piniartullu kattuffiani KNAPK-mi siulittaasoq Leif Fontain oqarpoq. Qanorlu iliorlutik nunarsuarmioqatigiit KNAPK-miit paasitinniarneqassanersut oqaatigisinnaangikkallarlugu.

Piujuartitsinissaq tunngavigalugu killilersugaasumik arfanniartalernissaq pillugu siunnersuuteqarnissamut suleqatigiissitaq Københavnimi ataatsimeeqammerpoq. Nunallu tamalaat arfanniarneq pillugu ataatsimiitsitaliarsuat junimi Koreami ataatsimiilerpat siunnersuut akuerineqassanersoq suli nalunarallartoq Piniarnermut pisortaqarfimmeersoq Ole Heinrich oqarpoq.

Naalagaaffeqatigiinerup iluani Savalimmiuneersoq Kate Sandersoq nunarput aamma sinnerlugu IWC-mi maanna ataatsimeeqataasarpoq.