KNAPK naalakkersuisut siulittaasuannut: inatsisartut ataatsimiigiaqquneqarlik !

Nuummi aalisartut aalisariutinik qulinik Nuup umiarsualivianik assersuinerat suli ingerlanneqarpoq
Allattoq Jaaku Lyberth
juulip 05-at 2009 13:13

Aalisartut Piniartullu kattuffiata KNAPK ip piumasaraa inatsisartut immikkut ataatsimiigiaqquneqassasut, aalisakkat akiisa minnerpaaffilerneqarnissaat pillugu. KNAPK p siulittaasua Leif Fontaine Naalakkersuisut Siulittaasuannut Kuupik Kleistimut allagaqarluni piumasaraa inatsisartut ataatsimiigiaqquneqassasut.

Aalisakkat tunineqartarnerinut akit appasippallaarnerat tunitsivigineqarsinnaasullu killeqarpallaarnerat pissutigalugit aalisartut angallatitik inigisatillu annaasinnaagaat Leif Fontainip siornatigut naalakkersuisunut allagaqarnerni innersuussutigalugu allappoq.

Nuummi umiarsualivimmik assersuineq politiinit malinnaaffigineqarpoq.

Assersuinermik peqataasut tamarmik pinerluttulerinermut inatsimmik unioqqutitsimasutut pasineqassasut nunatsinni politimesteriugallartoq Bjørn Bay oqarpoq. Aalisartut Nuummi umiarsualivimmik assersuisut assersuinertik unitsinnianngippassuk, piffissap ilaani qaquguugaluarnersoq, assersuinerat unitsissavarput, politimester Bjørn Bay oqarpoq. Aalisartut kajumissaassavakka assersuinertik unitsissagaat, tamanna kikkunut tamanut ajunnginnerussammat politimester Bjørn Bay oqarpoq.