KNAPK: Naalakkersuisut isumasioqatigiissitsisariaqarput

Kalaallit Nunaanni Aalisartut Piniartullu Kattuffiata siulersuisuuneri qinigaaffiup qiteqqunnerani Ilulissani ataatsimeeqqammersut, Naalakkersuisunut assigiinngitsunik oqariartuuteqarniarlutik aalajangiukkaat, KNAPK-p siulittaasua Peter Olsen tusagassiuutinut nalunaarpoq.

Piniarneq pillugu isumasioqatigiinnissaq piaartumik piviusunngortittariaqarsorineqarpoq, piniarnermut apeqqutit, soorlu qilalukkanik pisassiisarnermi killilersuineq aamma isorliunerusuni piniartut kaperlannerani atugaasa artornarsigaluttuinnarnerini arlaatigut naalakkersuisunit iliuuseqarfigeqquneqarlutik.

Aalisakkat raajallu akiisa minnerpaaffilerneqarnissaat aamma sulissutiginiarneqarpoq, soorluttaaq timmissanik piniarnermi killilersuinerup, sinerissani sumiiffinnut naleqqussarnissaa aaqqiissuteqarfigeqquneqartoq.

Puisit amiisa akilersinnaanerusumik akeqartilernissaat aamma iliuuseqarfigeqquneqarpoq.

Taariikkanut tapiliullugu aamma silaannaap allanngoriariartornerata malitsigisaanik piniartut ajornartorsiortut kommunini ikiorserneqartarnerisa sumiiffinni assigiinngitsuni assigiinngippallaamik suliarineqartarnerat sulissutigeqquneqarpoq, assigiinneruleqqullugit.

Naggataagullu KNAPK-p siulersuisuunerisa partiinik suleqateqarsinnaanertik akuersaarpaat, kisinnilerlugu, tassa kattuffiup maleruagassaasa iluini aatsaat partiinik suleqateqarsinnaasoqassasoq aalajangeramikku.