KNAPK naalakkersuisunut saaffiginninnialerpoq

KNAPK-p Royal Greenlandillu raajat akii pillugit isumaqatiginninniarnerat unittooqqajuarsinnarpoq, KNAPK-lu Royal Greenlandimit ullumi tusanngikkuni naalakkersuisunut saaffiginninnialersaalerpoq.

-Ullumikkut Royal Greenlandimit tusagaqanngikkutta eqqarsaatigaarput KNAPK-p tungaaninngaanniit naalakkersuisut siulittaasuat Hans Enoksen aalisarnermullu naalakkersuisoq Finn Karlsen piumaffiginissaat isumaqatiginniarnermut akulerunnissaanik. Inuussutissarsiutip pingaarnersaani aalisarnermi raajarniat uninngaannarsinnaanngillat suliffissuarnilu sulisut aamma eqqarsaatigalugit, KNAPK-mi siulittaasoq Peter Olsen oqarpoq.

KNAPK naalakkersuisut siulittaasuannut Hans Enoksen-imut aalisarnermullu naalakkersuisumut Finn Karlsen-imut saaffiginnikkunik nassuiaassutiginiarpaat Royal Greenlandip raajat ukiumut pisiarisartagaat 200 millioni koruuninik naleqartut, sooq 215 millioni koruuninut qaffatsinniarnerlugit, raajarniarnerlu imminut akilersinnaasumik ingerlassappat isumaqatigiinniarnermut piumasatik aalajangiusimagitsik. Politikerillu akulerunnissaat Peter Olsen-p pingaartilluinnarpaa:

-Inuussutissarsiummi pingaarnerpaasumi raajarniat uninngapput. Tunisiumajunnaarneq isumaqarpoq, atukkatik ajorluinnarsimasut, tunisiumajunnaarnerullu uppernarsarpaalusooq angusaqarusunnerminnik takutitsisut. Taamaammat isumaqarpunga politikerit qulliusut isiginngitsuusaaginnarsinnaanngikkaat, aalisartut qanoq ilungersortigisut, Peter Olsen oqarpoq.

Naalakkersuisut siulittaasuat Hans Enoksen tallimanngormat Qanoruumi oqarpoq KNAPK-p Royal Greenlandillu isumaqatiginninniarnerannut akulerunnissartik pilersaarutiginagu.