KNAPK naalakkersuisunut qinnuteqaqqaartariaqarpoq
Aalisartut orsussamut tapiiffigitittalissagunik naalakkersuisunut qinnuteqaqqaartariaqartut, radioaviisikkut qinnuteqaratik, Piniarnermut Aalisarnermullu naalakkersuisoq Finn Karlsen oqarpoq.
Orsussaq 10 procentimik qaffatsinneqarmat KNAPK-mi siulittaasoq Peter Olsen aalisartut orsussamik tapiiffigitittalernissaanik sapaatip akunnera kingulleq naalersoq naalakkersuisunut eqqarsaatigeqqeeqqusivoq. Aalisartut orsussamik tapiiffitittalernissamik ukioq una aallarteqqammersoq qinnuteqaraluarput, itigartinneqarlutilli. Maannalu ukioq qiteqqutiinnartoq qaaffaaqquseqqipput.
-Aalisartut orsussaq akitsortorlu tapiiffigitinnissamik qinnuteqaannaratik, aalisakkanut akit qaffasinnerutinniarsinnaavaat. Raajarniat isumaqatiginninniarnerminni iluatsitsilluarput, maannalu orsussamik tapiiffigitinnissamik pisariaqartitsinatik. Nunarsuarmioqatigut eqqarsaatigalugit nunatsinni aalisakkanut akigititat qaffasinnerujussuusinnaagaluarput, Finn Karlsen Narsarsuarmi akunneqqasoq oqarpoq.
