KNAPK: Misileraanissamut aalisakkat naammaqqajanngillat
Suliffissaaleqisut saniatigooralugu ilaatigut sikukkut aalisarnissaannut qaleralinnik tonsinik tallimanik pisassinneqarsinnaanerat Upernavimmi Inuussutissarsiornermut siunnersuisoqatigiinnit ippassaq ujartorneqarpoq.
- Upernavimmi Inuussutissarsiornermut siunnersuisoqatigiit siunnersuutigisaattut nunami sulisut tamarmik immikkut 5000 kiilunik pisassinneqassappata tonsit tallimat pineqartut sumit pissarsiarineqassanersut KNAPK-mi pisortap Petrus Biilmannip apeqqutigaa.
- Inuussutissarsiutigalugu aalisartut qaleralittassanik amigaateqareerput. Taamaammat nunami sulisut aqutsiveqarfimmut pisassiissutaasunit tamarmiusunit pissarsisalissappata inuussutissarsiutigalugu aalisartunut pisassiissutaasut annertugisassaanngereersut ilanngartuiffigineqalernissaat akuerisinnaanngilarput, Petrus Biilmann oqarpoq.
Upernavimmit suliffissaqartitsiniarnikkut aaqqiissutissatut siunnersuutaasoq allaganngorlugu pissarsiarereeruniuk aatsaat isummerfiginiarlugu Aalisarnermut Naalakkersuisoq Finn Karlsen Radioaviisimut ippassaq oqarpoq.
Upernavimmut, Uummannamut Qeqertarsuullu tunuanut TAC-mit ataatsimoortumit maannakkut pisassiisoqartarpoq agguaariaatsillu siumoortumik aalajangersarneqareersut atorlugit angallataatilinnut umiatsiaararsortunullu agguaassisoqartarluni.
Angallatinut anginerusunut pisassiissutaasut maannakkorpiaq tonsit 4.118-iupput umiatsiaararsortunullu pisassiissutaasut ikinnerulaarlutik - tonsit 3.882-iullutik.
