KNAPK-mi siulittaasup taarserneqarnera uggorineqarpoq

KNAPK Ilulissani ataatsimeersuarmat siulittaasoq Leif Fontaine taarserneqarpoq, tassa 41-inik ukiulik saattuarniutilik Peter Olsen, Sisimiuneersoq siulittaasunngormat. KNAPK-imi siulittaasup taarserneqarnera aalisarnermik aallussaqartunut assigiinngitsunut naliliiffigitipparput. Siullermik aalisarnermut naalakkersuisoq Rasmus Frederiksen ima oqaaseqarpoq:

- Tassa uggornartuuvoq siulittaasup taarserneqarnera. Oqaatigerusupparput suleqatigilluarsimmallugu, minnerunngitsumik siulersuisuunerit, Rasmus Frederiksen oqarpoq qularutiginnginnerarpaali siulittaasunngortoq Peter Olsen, aalisarnikkut tunuliaqutai annertummata aamma suleqatigilluarumaaritsik. Nutaamik siulittaasoqalerneq, KNAPK-imi suliassat anguniagassallu tulliuttut allanngornerannik kinguneqarnissaa ilimaginngikkini Rasmus Frederiksen oqarpoq.

Royal Greenland-ip siulittaasua Paaviaaraq Heilmann ima oqarpoq:

- Anguneqartut kattuffiup nammineq isummersorfigissavai, Royal Greenlandip isummersorfigissanngilai. Royal Greenlandimit taamaallaat kissaatigaarput suleqatigiinneq pitsaasoq ingerlteqqinneqarumaartoq. Leif Fontainep uppisitaaneranut atatillugu kiap siulittaasuunissaanut Royal Greenlandi oqaasissaqarfiginninngitsoq Paaviaaraq Heilmann erseqqissaavoq.

Avataasiutinik aalisariutillit kattuffiata APK-p siulittaasua Lars-Emil Johansen oqarpoq Leif Fontainep qinigaaqqinnginnera tupaallannarlunilu uggornartuusoq. Fontainep qinigaaqqinnginneranut tunngavilersuutigineqartut Lars-Emil Johansen-ip paasisinnaannginnerarpai.

- Raajarniarnerup oqaluttuarisaanerani raajat akikinnerpaajunerata tunngavilersuutiginiarneqarnera eqqumiippoq, siulittaasummi raajat akii qanoq iliuuseqarfigisinnaanngimmagit, raajanut akit nunarsuarmi akinit aalajangersarneqartarmata. KNAPK-mi siulittaasunngortup Peter Olsen-ip EU-mut raajartassissutit nunatsinnut tunniunneqarnissaannik suliniuteqarniarnera Lars-Emil Johansen-ip eqqumiittutut isigaa, tamanna nammineq Leif Fontainellu suliniutigereeramikku. Taamaattorli KNAPK-p siulittaasussaminik qinersinera ataqqigini siulittaasunngortullu siunissami suleqatigilluarnissaa neriuutigini Lars-Emil Johansen oqarpoq.

KNAPK-p ilulissani ataatsimeersuarnerani siulittaasussasiornermi Leif Fontaine 13-inik taaneqartoq, Peter Olsen 15 taaneqarluni siulittaasunngorpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat