KNAPK: Kingusinaarlutik qilalugartassiipput

Qilalugartassiisarnermut maleruagassat inatsisillu Naalakkersuisut malittussaagaluarlugit malinngilaat, tassa kingusippallaamik qilalugartassiisarput, taama aalisartut piniartullu kattuffiata knapk-p siulittaasua Peter Olsen uparuaavoq.

- Qilalukkat pillugit nalunaarummi allaqqavoq ukioq pisassiivik tassaasoq, julip aallaqqaataaniit junip 30-ianut. Naalakkersuisut piffissaq qaangerujussuarlugu pisassiinialerput, Peter Olsen tikkuaavoq.

Taama kingusitsigisumik pisassiisarnerit piniartut ilaasa unioqqutitsillutik qilalugarsimasutut politiinut unnerluutigisaanerannik kinguneqartartoq, Knapk-mit erseqqissaatigineqarpoq.

Qilugartassiinissaq pillugu Naalakkersuisut tusarniaassutaat knapk-p juulip pingajuanni tigusimavaa, tusarniaassullu kingusinnerpaamik julip 18-ianni ulloqeqqartinnagu akeqquneqarpoq.

Peter Olsenip tikkuarpaa tusarniaaneq allaat kingusinaartoq, tassami inatsisit naapertorlugit julip aallaqqaataanili pisassiisoqarsimasussaagaluarmat.