KNAPK: Kapisilinniarneq akilersinnaasariaqarpoq
- Takujuminaatsippara kapisillit pisissaassutigineqartut aalisartut amerlasuunik aningaasarsissutigisinnaassaneraat. Tunitsiviit sumi tunitsivussanersut kapisilinnullu kiilumut qanoq akiliisitsiniarnersut tamatumuna aamma apeqqutaasorujussuussaaq, KNAPK-p siulittaasua Leif Fontaine oqarpoq.
KNAPK-llu siulittaasuata oqaatigaa aalisartut kapisilinnik tunitsivinnut kingullermik tunisisarallaramik tunisinertik aningaasarsissutivallaarneq ajoraat.
- Tunisassiorfiusimasup NUKA A/S-ip pingasunik 2001-mi tunitsiveqartitsigallarami kapisilik kiilumut 9 koruuneqartippaa, Leif Fontaine erseqqissaavoq.
- Taamani kapisilinniarneq imminut akilersinnaanngimmat aalisartunit unitsinneqarpoq. Taamaattumik aalisartut maannakkut kapisilinniarnissaminni akilersinnaasumik aningaasarsiorsinnaanissaat pingaaruteqarpoq, soorlu aamma nunatta sineriaata ilaani kapisilinnik sumi tunitsiviliinissaq pingaaruteqassalluni, Leif Fontaine erseqqissaavoq.
Amalie Jessen, Aalisarnermut Naalakkersuisoqarfimmi allaffimmi pisortaq, KNR-mut ilisimatitsivoq kapisilinnik tunineqarsinnaasunik pisasseeqqinneq tassaasoq Naalakkersuisut nunatta pissarititaanik suli atorluaanerunissamik anguniagaannut ilaasoq.
Naalakkersuisoqarfimmiillu erseqqissaassutigineqarpoq nammineq atugassanik aamma inuussutissarsiutigalugu kalaalimineerniarfinni, napparsimmavinni, hotelini, neriniartarfinni ilaallu ilanngullugit tuniniagassanik kapisilinniartoqarsinnaasoq, ukiut siuliinisut.
Kapisilinniarneq ullumi aallartinneqartoq oktobarip 31-ani unissaaq.
