KNAPK itinerusumik isumaqarpoq

Maannakkulli KNAPK-p pisortaa Petrus Biilmann allatut oqarpoq. Paragraaffi aalisartutut inuussutissarsiuteqartuunissamik piumasaqaatitalik, tunitsivinnut anginernut kisimi atuussaaq, aalisartunullu sunniuteqarnani, maannakkut Petrus Biilmann oqarpoq.

- Uaniuna taamaallaat pineqartoq, nunami suliffeqarfiit toqqaannartumik nammineq, assersuutigalugu qaleralinniutinik angallatinik, pisiortornerat tamanna uagut eqqortuunngitsutut isigaarput, Petrus Biilmann oqarpoq.

KNAPK-mi pisortap isumaa ajornaannerugaluarpoq.

- Aalisartut aalisassapput, tunisassiortullu tunisassiussapput, Petrus Biilmann ulluannguit qaangiummata oqarpoq.

Maannakkut itisiliinerusumik isumaq saqqummiuttussanngorpoq Biilmann nassuiaavoq.

- Oqarnikluunngilagut kisimi aalisartoqassasoq, kisimilu tunisassiortoqassasoq, Petrus Biilmann oqarpoq.

Taassuma eqqaasitsissutigaa, aalisarnermut naalakkersuisup, Karl Lyberthip, iluarsaaqqinniarnerani immikkoortut, tunisassiortunut angisuunut piumasaqaasiisut kisiisa

KNAPK-p tapersersormagit.

- Kalaallit aalisartut, KNAPK ataani ilaasortaasut, kaammattortarsimavagut periarfissaq takkuppat fabrikkimi piginnittuusinnaanermut, taava piginnittuunissartit tunuaarfigissanngikkaat, Petrus Biilmann oqarpoq.

Tassalu aalisartutut inuussutissarsiortuunissamik piumasaqaat taama aamma pasineqarsinnaasutut isigaa.

Polar Seafoodip siulersuisuini siulittaasup, Henrik Lethip, sapaatit akuneranni kingullermi oqarpoq, suliffeqarfimminni pinngitsaaliissummik qinigassinneqassagunik, nammineq aallisarneq qinerumaaritsik. aalisarnermik iniissutissarsiortut akornanni ajornartorsiut tamanna KNAPK-imi arajutsisimaneqanngilaq.

- Paasilluarsinnaavara Hinnariup annilaangassutaa, aamma uanga soorunami taamak annilaangassagaluarama, KNAPK-p pisortaa Petrus Biilmann oqarpoq.