KNAPK: Immikkut ittumik aaffattassiisoqarli
Aalisartut Piniartullu Kattuffiat Naalakkersuisunut taama kajumissaarivoq, taakkumi isumaqarput, Qaanaami eqqaanilu piniartut aavernik 25-nik immikkut ittumik pisassinneqarnissaminnik pisariaqartitsilluinnartut.
KNAPK-p taamatut kajumissaaruteqarnermini tunngavilersuutigaa, Avanersuarmi silap anorillu malunnartumik unerisimajunnaaraluttuinnarnerat puisinniarnermut killiliisimasoq. 'Tamatumalu saniatigut piniarnissamut periarfissat allat tamarmik killeqarput taavanilu aningaasarsiutigalugu aalisartoqarani', KNAPK ilaatigut taama tunngavilersuivoq.
Aarrit neqaat annerusumik qimminut nerukkaatitut atorneqartarput.
- Piniartukkormiuusugut qimminut nerukkaatissanik KNI-mi pisinissatsinnut akissaqanngilagut. Taamaattumik Naalakkersuisut ukiup naanissaanut aaffattassanik 25-nik amerliliinissaat ilungersorluta kajumissaarutigaarput, Qaanaami piniartut sapaatip akunnerani matumani siusinnerusukkut, aalisarnermut piniarnermullu naalakkersuisumut Ane Hansenimut, ilaatigut taama allapput.
