KNAPK: EU-mik niueqateqarsinnaaneq sunniuteqanngilaq

Puisip amiinik tunisassianik EU-p eqqusseqqusiunnaarnera isornartorsiorneqaqisoq, nunatsinnut atuutinngikkaluarpoq, kisianni tassa annertuumik eqquereersoq, KNAPK-mit oqaatigineqarpoq, isumaqarlutillu issittumi inuit EU-mik niueqateqarnissamut mattunneqannginissaat sunniuteqanngilluinnartoq.
Allattoq Gedion Storch
maajip 27-at 2011 05:00

Kisianni tassa inerteqquteqarneq atorunnaarsinneqaratarsinnaasoq, KNAPK-miit eqqoriarneqarpoq, nunat arlaqartut USA Kinalu siuttoralugit Norgemut Canadamullu suliamut tunngatillugu tapersiuteqareernerisa kingorna.

- Naalagaaffinnit annertuumik niuernermik ingerlatsiffiusunit tapersersorneqalernerup kingunerilluarsinnaavaa eqqussueqqusiunnaarnerup atorunnaarsinneqarnera, Leif Fontaine naliliivoq.

Norgep Canadallu piumasarinikuuaat, puisip amiinik tunisassianik EU-p eqqusseqqusiunnaarnera, nunarsuarmi niueqatigiinnikkut suleqatigiiffissuarmit WTO-mit misissuiffigineqassasoq, isumaqaramik taamatut aalajangerneq niuernikkut isumaqatigiissutit pillugit aalajangersakkanik unioqqutitsinerusoq.

Taamatut nalunaruteqarneq nunarpassuarnit soorlu USA-mit, Columbiamit, Japanimit, Mexicomit, Islandimit, Kinamit, Argentinamit, Ecuadorimit kiisalu Namibiamit tapersersorneqarneranik kinguneqarsimavoq. Taaneqartoq kingulleq inuit ilaaannut tupaallatsitsisinnaavoq tassami Naalagaaffiuvoq piniartoqarfiusoq, ukiumummi puisit 125.000-it pisarineqartarput.

Kisianni tassa puisinniartarnerup illersorneqarsinnaasumik naalliutsitsinngitsumillu ingerlanneqartarnera EU-mi inatsisartunit suli akueriumaneqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq