KNAPK : Esperseni kusanaatsuliorpoq

Danskit Inatsiseqarnermut ministeriat Lene Espersen, nunatta Canadamit amersisaleqqisinnaanissaa pillugu naalakkersuisut aalajangernerannut akerliulluni sapaatip-akunnerani kingullermi TV-Avisikkut oqaaseqarpoq.

Lene Espersen isumaqarpoq nunarput Canadamit amersisaleqqissaguni tusaamanerlugaalissasoq, tamannalu pillugu naalakkersuisut eqqarsaqqittariaqartut. Nunarput Canadamit pisisaleqqissappat, amernik nunatsinneersunik pisiumajunnaaqqusilluni Lene Espersen inatsivoq.

Inatsiseqarnermut ministerip taama saqqummiussinera kusanaatsuliornerusoq KNAPK-p siulittaasua Peter Olsen oqarpoq:

-Qallunaat naalakkersuisui Kalaallit Nunaannut taama sakkortutigisumik pissusilersornerat KNAPK-miit assorujussuaq ajuusaarnartuutipparput, akuersaarsinnaanagulu. Qallunaat naalakkersuisui kalaallinut taama pissusilersornerat assorsuaq kusanaagaarput.

KNAPK iliuuseqarniarpoq, naalakkersuisunut saaffiginnilluni.

- Saaffiginnissutigissavarput kalaallit ameerutaat ulorianartorsiortinneqartariaqanngillat Canadamut niuerumanersuaq, niueqatiginnikkumanerujussuaq piinnarlugu. Tassa ammit nunatsinneersut ulorianartorsiortinneqartariaqanngillat Canadamiut amiutaat piinnarlugit. Tamanna pillugu naalakkersuisut inakkusuppagut, Canadamit amersisaleqqinniarneq eqqarsaatigeqqeqqullugu, kalaallit piniartut ulorianartorsiortinneqartariaqanngimmata.

Lene Espersen isumaqarpoq nunarput Canadamit amersiniartassanngitsoq, taama isummerneranut KNAPK taamaattoq isumaqataanngitsoq Peter Olsen erseqqissaavoq.

- Piffissap siuliani isumarput saqqummiunnikuuvarput tassa kalaallit ammeriviat kalaallinit pilersorneqartariaqartoq.