Nunatsinni Ammerivik Great Greenland, nunatsinni puisittat amiinik ameerutinik tusindtinik arlaqartunik siorna ukiakkut eqqaasimanerarlugu Narsami namminersorluni amernik tigooraaviutilik ippassaq saqqummiussivoq. Tamanna tunngavigalugu misissuisitsisoqartariaqartoq Aalisartut Piniartullu kattuffiata siulittaasua Peter Olsen isumaqarpoq.
- Tusarsimavarput amminik amerlasuunik eqqaasoqartarsimanera kattuffimmi aamma tusarparput. Tupinnarpoq ammerivik taama sakkortutigisumik eqqaasarsimappat, eqqaamassavarpummi amernik tigooraasartut pikkorissartinneqarnikuupput amernillu tigooraaneq siuariarujussuarnikuulluni.
- Ammeriviup piniartut pisuuteriassappagit oqassaagut piniartup ameq pitsassuaq nutaarlu tunniuttarpaa. Ammeriviup ilumini amernik taama pitsaatigisunik tavaasarsimaguni pitsaassutsimik paarsinini sakkortusartariaqarpaa. Ammit tiguneraniit paarsinini pitsanngorsartariaqarpaa.
Nunatsinni piniartut ameerutaannik eqqaasarsimaneq KNAPK-mit nunaninngitsutut tiguneqarpoq.
- Apeqqutaavoq taakkua nunatsinneersuunersut, kisiannilu oqartoqarluni nunatsinneersuusut. Kisanni tassa ikippallaarnerarialugit taava eqqaalluni. Tamanna pillugu Ammerivik nassuiaateqarluinnartariaqaraluartoq isumaqarpunga, Peter Olsen oqarpoq.
- Sooq ammit taamarsuaq eqqartarnerlugit innuttaasunut ersarissumik nassuiaatigisariaqarpaa.
KNAPK-p Namminersornerullutik Oqartussat eqqaasarneq pillugu aamma nassuiaateqarnissaannik piumasaqarfigissagitik Peter Olsen oqarpoq.