KNAPK ataatsimoorfiusussamik kattuffimmik pilersitseqqusivoq
Aalisartut kattuffii marluk, KNAPK aamma GA, kattuffimmik ataatsimoorfiusussamik pilersitsissasut, KNAPK siunnersuuteqarpoq.
KNAPK-p siunnersuutigisaatut kattuffik atatsimoorfiusussaq KNAPK-mut GA-mulluunniit taartaassanngilaq, politikkikkulli aalajangiisartunut illua tungiliuttuussalluni.
KNAPK marlunngormat februaarip qulingiluaani isumasioqatigiisitsivoq, GA-miit aamma peqataaffigineqartumik. Tassani ilaatigut KNAPK-mit GA-millu ilaasortaaffigineqartumik aalisartut kattuffiisa ataatsimoorfeqalernissaat, KNAPK-miit siunnersuutigineqarpoq.
GA isumaqarpoq, isuma tusarlugu soqutiginartuusoq. Kisianni takussaassumik siunnersuusiortoqarpat aatsaat tunuliaquttaminnut saqqummiussaqarsinnaallutik, GA-mi suliniutinik ataqatigiissaarisoq Jens K. Lyberth Radioaviisimut oqarpoq.
Kisianni KNAPK-p siulittaasua Leif Fonaine isumaqarpoq, aalisarnermik soqutigisallit peqatigiiffinnut assigiinngitsunut avissartuussimanera maanna oqaluuserineqartariaqartoq. Inuttat nutaamik kattuffilioreerunik aamma kattuffimmi ataatsimoorfiusussami peqataassasut KNAPK-miit takorloorneqarpoq.
- Kattuffik ataatsimoortoq umaatigut inuussutissarsiuteqarnermik kattuffik nukittunerususussaavoq aammalu pingaartumik naalakkersuinikkut tassani illuatungilkiuttutut nukittuutut inissinnissaq takorlooruminarpoq. Aamma isumaqarpugut inuiaqatigiit, soorlu Kalaallit Nunaani imaatigut inuussutissarsiornermik toqqammaveqartut pingaarnerpaamik ataatsimoornissaat pisariaqartoq, Leis Fontaine oqarpoq.
KNAPK-p aamma GA-p soqutigisaat assigiinngitsutigut aporaaffeqartarput. Assersuutigalugu KNAPK-p kissaatigaa, sinerissamut qanittumi aalisarnerup avataaasiorlunilu aalisarnerup immikkoortuarnissaa, illuanit GA-mit kissaatigineqarluni, aalisaneq aggulunneqarunnaarluni ataatsdimut isigineqalissasoq.Tamaakkaluartoq Leif Fontaine isumaqarpoq, aalisartut katersuussinnaasut:
- PIssutsit taamaakkaluartut ataatsimoorfiusumik kattuffeqarsinnaavoq, soorlu nunani allani taama kattufeqarneq takussaasoq.
Avataasiortut aamma sinerissap qanittuani aalisariutit ataatsimut kaffuffiliunngikkaluarlutik, paraplyorganisationiliorsinnaapput, kattuffittut itttoq ataaseq, peqatigiiffiit kattuffiillu immaqa isumaqatigiinngikkaluarlutik ataatsimut inissisimaffissaannik, KNAPK-p siulittaasua, Leif Fontaine oqarpoq.
