KNAPK: Arfanniartartut kisimik ilaasortaassapput!

Nunatsinni qulinik qipoqqartassinneqarnissaq ukiorpaalunni IWC-mit itigartinneqartuarpoq, Kalaallit Nunaallu tusaaneqarsinnaanngussappat, KNAPK-p nunat imaanut sineriaqanngitsut ilaasortaajunnaartariaqarsorai. KNAPK kaammattuutinik maanna naalakkersuisunut ammasunik allagaqarput. Peter Olsen, KNAPK-p siulittaasua oqarpoq:

- Tassani tunngavigaarput IWC-mi nunat ilaasortat arfanniarnermik ingerlataqanngitsorpassuit ilaasortaammata. Taamaattumik uagut KNAPK-miit kissaatigaarput IWC tassaasariaqartoq nunat arfanniarnermik ingerlatsisuusut kattuffiat, Peter Olsen oqarpoq.

Ullumikkut ilaasortat uumasunik illersuiniaqatigiinnik aallaaveqarpallaartut KNAPK aamma isumaqarpoq.

- IWC nutarterneqassappat tassaasariaqarpoq nunat arfanniarnermik ingerlatsisut kattuffiat, erseqqissaavoq.

IWC-mi nunat ilaasortat 70-it sinneqarput, taakkulu affaasa missaat “naaggaartartuusut”, kattuffiup eqqoriarpaa.

Østrigikkut allallu nunat imartaqanngitsut ilaasortaasariaqannginnerarpaat.

KNAPK-mi eqqarsaatigineqanngilaq siunertarineqarnanilu IWC-mi aallartitaqartarnerup unitsinnissaa.

- Arfanniartunik ilaasortaqalernissaa uagut piumasaraarput. Imaaliallaannaq piviusunngorsinnaanngilaq, taamaaliortitsigulli isumarput erseqqissumik annipparput.

KNAPK-mi siulittaasoq Peter Olsen taama oqarpoq. Arfanniarneq pillugu ataatsimiititaliarsuaq juunip ingerlanerani Amerika kujallermi Chilemi ataatsimeersuassaaq, KNAPK-millu aallartitarineqassaaq Leif Fontaine.