KNAPK: Aningaaserivinnit atukkat ESU-mut nuunneqarlik!

Taanna ilaatigut isumaqarpoq, sinerissamut qanittumi aalisartut aningaaserivinnit atugaat ESU-mut nuunneqartariaqartut.

John Biilmannip eqqaasitsissutigaa, sinerissamut qanittumi ukioq manna qaleralittassat siornamut naleqqiullugit ikinnerummata:

- Pisassiissutit ingammik Qeqertarsuup Tunuani 12.500 tonsinit 8.500 tonsinut ukiormanna ikilisinneqarput. Taakkua peqqutaaqataallutik maannakkut ajornartorsiortoqarpoq. Ajornartorsiutit tamakkua aqqutissiuunneqartariaqarput. Ajornartorsiortut ilaat aningaaserivinnit erniakkaanik atornikuupput.

KNAPK-mit isumaqarpugut aningaaserivinnit atukkat tamakkua ESU-mut nuunneqarsinnaanerinik naalakkersuisut piginnaatitsisariaqartut.

Aappaattut aalisariutit ningittakkersuutinik atortulersorneqarnissaat siunnersuutigerusupparput. Taamaalillutik aalisartut pisarisartagaat amerlisinnaammata, aningaasarsiornerallu pitsaanerusumik aqqutissiuunneqarluni.

KNAPK-mit ilanngullugu inassutigerusupparput, fiskerifinansieringspulje maannakkut 20 procentiusoq 40 procentimut qaffanneqassasoq. Taamaalilluni angallatit atortunik piniartarnerat ajornannginnerusumik ingerlasinnaalerniassammat. Taava aalisagaq ataasiinnaq aallunnagu ukiup kaajallakkiartornerani aalisariaatsit arlallit ingerlanneqarsinnaanerat aamma aqqutissaavoq.

Sinerissamut qanittumi aalisarneq imminut akilersinnaassappat aalisariutinik nutarterisoqartariaqarpoq, John Biilmann naggasiivoq.

Taassuma erseqqissarpaa, qaleralinniartuinnaanngitsut, aammali assersuutigalugu sinerissamut qanittumi raajarniartut, tapiiffigineqartariaqartut.