KNAPK: Akit pillugit misissuineq sukumiinerusinnaavoq
KNAPK-p misissuisitsisimanera Sulisitsisut Peqatigiiffiannit GA-mit, aalisarnermilu aningaasarsiornikkut Syddansk Universitetimi ilisimatuumit Niels Vestergaardimit isornartorsiorneqarpoq.
Misissuisitsisimanerup tatiginassusaa taakku apeqquserpaat, pingaartumik raajat akii pillugit inerniliisoqarnerani apeqqusiisoqarluni.
Paasissutissalli tamakku Royal Greenlandip Polar Seafoodillu saqqummiukkusussimanngilaat, Leif Fontaine ullumi oqarpoq. Paasissutissat taakku avammut saqqummiunneqarnissaat pingaaruteqaraluartoq, taassuma oqaatigaa:
- Ukiorpassuarni pissarsiariniartarsimagaluarpavut, aamma selskabinut assigiinngitsunut akit pillugit isumaqatigiinniarnerni tamakku piumasarisarsimallutigit, kisianni pingaartumik Royal Greenland aamma Polar Seafood eqqarsaatigalugu paasissutissanik taamaattunik tuniumaneqanngisaannarpugut ulloq manna tikillugu, KNAPK-p siulittaasua Leif Fontaine oqarpoq.
Suliffeqarfik GEMBA Seafood Consulting aalisakkat qaleruallillu akiinik KNAPK-mit 250.000-it koruuninik naleqartumik misissuisinneqarpoq, paasissutissalli sukumiinerusut pissarsiarineqassappata Namminersorlutik Oqartussat misissuisitsisariaqartut, Leif Fontainep oqaatigaa.
KNAPK-lli misissuisitsisimanera naammassimannginnerami? Leif Fontaine ima akivoq:
- Taamanikkulli qaammatit pingasut matuma siorna nalunaaruteqarpugut soorlu tunisassiornermi aningaasartuutit aammalu avammut niuernermi tunisassiat qanoq tunisassiarineqartarsimanersut, aammalu aningaasat sumut pisarnersut tamakku ilisimasaqarfiginnginnatsigit, misissuinerit tassunga tunngasut Namminersorlutik Oqartussaninngaanniit ingerlanneqartariaqartut, suu, KNAPK-p siulittaasua Leif Fontaine oqarpoq.
