KNAPK akerliussutsimik takutitsiniarpoq
EU-p puisit amiinik eqqusseqqusiunnaarnera matumani akerliuffiginiarneqarpoq, soorlu aamma Ruslandimut, Hvideruslandimut Kazakhstanimullu eqqusseqqusiunnaarneq akerliuffiginiarneqartoq.
Nagguteqatigiit Inuit immikkut ittumik aaqqiivigineqarlutik puisit amiinik EU-mut eqqussisinnaagaluartut taamatut aaqqissuussineq iluaqutaavallaanngitsoq KNAPK-p oqaatigaa.
- Puisit amiinik EU-mut eqqusseqqusiunnaarneq pissutaalluni puisit amiinik niuffanneq unittuuissimavoq, kalaallillu puisinniartarnerat eqqorneqarnerlulluni, KNAPK allappoq.
Radioaviisip paasisai naapertorlugit piniartut Nunatsinneersut 15-it akerliussutsimik takutitsinermi peqataassapput, Kgs. Nytorvimiillu Fælledparkip tungaanut ingerlaassallutik.
Tamaani tupimik nappaasoqassaaq, kalaallillu puisinniartartut atugaat paasissutissiissutigineqassalluni. Piniariaatsit suunersut piujuaannartitsinissarlu aallaavigalugu piniartarneq saqqummiunneqarumaarput, soorlu aamma tunisassiarineqartartut pitsaassusaat nassuiaateqarfigineqarumaartut.
Akerliussutsimik takutitsinissaq pisiniarfissuup Magasinip saavani Kgs. Nytorvimiittumi aallartissaaq, Magasinip puisit amiinit sulianik tunisisarnini ulloq taanna unitsinniarmagit.
Akerliussutsimik takutitsisimanermut atatillugu Kalaallit Københavnimi Illuutaanni apriilip 19-iani paasissutissiisoqarumaarpoq, Inuit Ataqatigiit sinnerlugit Folketingimut ilaasortaq oqalugiartunut ilaassalluni.
