KNAPK: -Aalisartut pisariaqartitsivissut pisassillik!
- KNAPK-miit isumaqarpugut aalisarnermut inatsit malinneqartariaqartoq, aalisarnermut inatsisip piumasaqaatai ataaniittullu tamaasa eqqortumik malitsinneqartariaqarput, immikkullu ittumik saarullittassiisoqarsimassappat inatsisit malinneqarsimasussaavoq, KNAPK-mi siulittaasoq Peter Olsen oqarpoq.
Peter Olsen isumaqarpoq pissusissamisoornerussagaluartoq aalisartunut pisassaminnik amigaatilinnut soorlu raajartassanik amigaatilinnut taamalu pisariaqartitsivissunut saarullittassiissutit tunniunneqarsimagaluarpata.
Aalisarnermik Naalakkersuisoq Finn Karlsen oqarpoq Piginneqatigiiffik taanna siornatigut qaleralinniartarsimasoq, qaleralinniarnermilu ajornartorsiortoqarnera tunngavigalugu kissaatiginartissimagitsik piginneqatigiiffiup taassuma saarullinniarnermik ingerlatsilernissaa. Aalisarnermik naalakkersuisup taama oqarnera qanormita Peter Olsenip isumaqarfigaa.
- Tassami aalisariaatsimut allamut saariataarsinnaassagaanni taava aalisariummik ingerlatsereersimasariaqarpoq, imaanngitsoq suliluunniit kilisaammik peqarani saarullittassanik noqqaaneq taanna pissusissamisoortutut isiginngilarput, aalisariutilli ingerlareersut pisassaminnillu amigaateqavissut pisassinneqartariaqarput, oqarpoq, nangipporlu:
- Isumarpunga naalakkersuisut immikkut ittumik akuersisimanerat minnerpaamik fiskerirådimut nassuiaatigineqartariaqartoq suliap qanoq ingerlasimanera nassuiaatigalugu. Taamaattumik GA-p taamatut piumasaqarnera uagut KNAPK-miit taperserparput suliallu qanoq ingerlasimanera aamma uagut paaserusupparput, taama oqarpoq KNAPK-p siulittaasua Peter Olsen. Taanna erseqqissaavoq saarullitaassinneqarsimagaanni aningaasat ikittuunngitsut pineqartartut.
