KNAPK: Aalisartut pillugit pilersaarusiorniaritsi

KNAPK-p siulittaasuata, Leif Fontainep maanna piumasaraa, aalisakkat qaleruallillu akii nunatsinni atuuttut pillugit nalunaarusiaq qanittukkut saqqummiutartik aallaavigalugu inatsisartut pilersaarusiortariaqartut nutaamillu qulaajaasitsisariaqartut.
Allattoq Najaaraq Egede
juunip 30-at 2011 05:06

KNAPK-p siulittaasuata aalisakkat qaleruallillu akiisa pitsaanerusumik aalisartut akissarsissutigisalissagaat Inatsisartunit qulakkeerniarneqeqaqquaa, KNAPK-mmi misissuisitsisimaneranit qanittukkut saqqummersumit takuneqarsinnaavoq aalisartortavut Canadami aalisartunut sanilliullutik akiluttortinneqarnerususut.

- Soormiuna akit taama appasitsigisimasut? Pissusissamisoornerusumik apeqqummut akissuteqarsinnaasut tassaapput pisortat tunisassiortullu niuernermik ingerlataqartut, oqarpoq.

Aamma Demokraatit politikikkut oqaaseqartartuata, Niels Thomsenip akinik misissuisitsisimanerup uppernassussaanik apeqqusiinera Leif Fontainep uparuarpaa.

- Demokraatit namminneerlutik piviusut pillugit paasissutissaateqarsimannginneramik? Aperaaq.

Aalisarnermut atatillugu aningasartuutaasartunik misissuisoqarnissaq pisariaqartoq Leif Fontainep aamma oqaatigaa.

- Aalisartut tunisigaangamik isertitaasa appasippallaarujussuarnerata ilumut Royal Greenlandip aningaasartuutaasa qaffasippallaarujussuarnerannik pissuteqarnersoq iluamik paasineqartariaqarpoq. Akit assigiinngitsuuneri nassuiaatissaqassamamta siunissami aningaasartuutit ilanngullugit qulaajaasoqarsinnaanera pissusissamisuussaaq, Leif Fontaine naggasiivoq.