KNAPK: Aalisarsinnaanermut akuersissutit kingusinaarujussuarlutik agguaanneqartarput.

Aalisarnermut Pisortaqarfiup aalisarsinnaanermut akuersissutinik kingusinaarujussuarlutik agguaassisarnerat peqqutigalugu aalisartut unioqqutitsillutik aalisartariaqartarput. KNAPK-mit ajornartorsiut ilisimaneqarpoq.

-KNAPK-p ilaasortaasa amerlasoorpassuit saaffiginnissutigisarpaat aalisarsinnaanissamut akuersissutit suli pisimanagit. Tassa assagiarsunnut akuersissutit qaleralinnullu akuersissutit kingusinaarujussuarlutik nassiussuunneqartarput, ilaannilu piffissaq sivisooq atorlugu aalisarsinnaanermut akuersissuteqaratik aalisarsinnaasarput. KANUANA-minngaanniit agguagassanik akuersisartuninngaanniit piffissaq sivisuallaaqaaq aalisartunut aalisartunut tunniunneqartarnerat, KNAPK-mi siulittaasoq Peter Olsen oqarpoq.

Sinerissami Nakkutilliisut 2005-imi akuersissuteqaratik aalisartut 61-it tigusaraat ukiup siuliani 16-iusut. Tigusarineqartut amerlanerit assagiarsunniartuusartut sinerissami nakkutilliisut oqaatigaat. Aalisartut akuersissuteqaratik sinerissami nakkutilliisunit tigusarineqaraangamik aalisarnerat ingerlaannartumik unitsinneqartarpoq.

-Soorlu ilaasortatta ilaat maanga kattuffimmut nalunaartarput akuersissummik pinissartik utaqqikatallugu, taavalu sinerissami nakkutilliisumit ikiffigineqarsimallutik. Ikiffigineqarnermilu kingorna aalisarnerat unitseqquneqartarpoq, tassa ukioq manna aalisarsinnaanermut akuersissummik suli pinikuunngimmata naak ukiup siuliini peqarsimagaluartoq. Tassa akuersissut sivisuallaarujussuarmik aalisartumut apuunniartarnera pissutaalluni, Peter Olsen oqarpoq.

Radioavisiminngaanniit assagiarsunniartoq oqaloqatigivarput, taannalu oqaluttuarpoq ukioq mannamut assagiarsunnut aalisarsinnaanissaminut akuersissut januaarip aallaqqaataanili tigoreersimasassaraluani, suli tigusimanagu.

Peter Olsen-ip nassuiaatissaqartinngilaa agguaassisarnerit sooq taama kingusinaartartiginersut.

Aalisarnermut pisortaqarfimmit oqaseqartitsiniaraluaratta iluatsinngilarput.