KNAPK-p tungaaninngaanniit ujartorneqarpoq raajanut akip tapianik Naalakkersuisut akuersisariaqartut. KNAPK-p ulluinnarni aqutsisuisa qanittukkut ataatsimeereerneranni oqariartuutigineqarpoq Royal Greenlandip raajanut akigititai appasippallaartut, tamannalu aalisarnermut ajoqutaaginnassasoq. Akitigulli isumaqatigiittoqassappat, taava aalisartut Royal Greenland suleqatigilluinnarlugu pitsaasumik angusaqarsinnaapput, Aalisarnermut Naalakkersuisoq Rasmus Frederiksen oqarpoq: - Ammit eqqarsaatigalugit qangali anguniarneqartuarsimavoq ammit pitsaanerpaat anguneqassasut, taamaalilluni piniartut naatsorsuutigaat pitsaasumik angusaqarnissartik, Aalisarnermut Naalakkersuisoq Rasmus Frederiksen oqarpoq.
KNAPK-p siulittaasua Leif Fontaine tusagassiutinut allagaqarnermini ujartorpaa Royal Greenlandip sinneqartoorutaanit aalisartut pissarsisinneqartalernissaat, Leif Fontaine-illu ima nassuiarpaa: - Nalunngilarput qalerallit akii allanngoriartunngitsut, taannalu naligiissumik titarneqarluni ingerlavoq, allanngussanani, taamaattumik isumaqarpugut piffissanngortoq qalerallit akiisa qaffannissaat, KNAPK-p siulittaasua Leif Fontaine oqarpoq, erseqqissaatigaalu Royal Greenlandip pisortaanera Keld Askær 2001-imi pisortaanertut ivertinneqareerluni fabrikkeqarfinni angalalluni neriorsuutigimmagu Royal Greenland sinneqartoortalerpat aalisartut akimik pitsaanerusumik sinneqartoorutit ilaannit tunineqartarnissaat. Leif Fontaine aamma oqarpoq suliffissuaq ingerlalluarsinnaanngitsoq tulaassuisui ingerlalluanngippata. KNAPK-p tungaaninngaannissaaq ujartorneqarpoq Royal Greenlandip qitiusumik aqutsisuini kalaalinngorsaasoqassasoq. Taamaalinikkut aalisartut Royal Greenlandilu akornanni suleqatigiinneq pitsaanerulissammat, nunatsinnullu ilisimaarinnittut sulilissagaluarlutik.
Aalisarnermut naalakkersuisoq tamanna pillugu oqaaseqarumanngilaq.
