KNAPK: Aalisakkat akii minnerpaaffilerneqartariaqarput
Inuiaqatigiit inuuniarnikkut siumut alloriaqqissappata tamanna pisariaqartoq, KNAPK-p siulittaasua Leif Fontaine isumaqarpoq.
- Tamatta nalunngilluinnarparput Royal Greenland A/S aningaasarsiornikkut ajornartorsioqisoq. Taamaammallu nunatta aningaasatigut naakkaattornissaa pinngitsoortinniarlugu inuiaqatigiit Royal Greenland A/S aningaasaliiffigaat.
Eqqaamaneqartariaqarporli RG A/S-p ajornartorsiorneratigut aalisartut inuuniarnikkut inuutissarsiornikkullu atugaat aamma eqqorneqarmata. Tamannalu aalisartut namminneq pisuussutiginngilaat, Leif Fontaine oqarpoq.
Saarullinnik aalisarneq periarfissaalluaraluartoq aalisartorpassuit tunitsivissaqannginnerat pissutaalluni aalisarsinnaanngitsut Leif Fontainep assersuutigaa. Royal Greenland A/S-ilu akigititai ima appasitsigipput aalisarneq imminut akilersinnaanani, KNAPK-p siulittaasua allappoq.