Kleist: Silaannaap allanngoriartornerata sillimmartaarfiginissaa oqaluuseritigu

maajip 04-at 2005 10:38

Silaannaap allanngoriartorneranut sillimmartaarnissaq pillugu oqallinnissamik siunnersuut Inatsisartut ualimanna oqaluuserissavaat. Piniarnermik inuussutissarsiuteqartut inuuniarnermikkut qanoq sunnerneqassanersut misissuiffigineqarpa ? Sanaartornikkut isseerukkiartornerata sunniutissai upalungaarsarfigineqarpat ? Apeqqutit ilaatigut taama ittut Naalakkersuisunut Inatsisartunullumi oqallinnissamik siunnersuuteqartup Inuit Ataqatigiinneersup Kuupik Kleistip saqqummiutissavai.

- Pinialuttarninni piniartullu oqaloqatigisarnerini nalunanngillat, silaannaap allanngoriartornerisa kinguneri. Soorlu naasut naajaarsimasinnaasarput orpikkallu ilaat ivigarsuarnik taarserneqarsimasarlutik. Kuupik Kleist nassuiaavoq.

- Isumaqarpunga sapinngisaq tamaat atorlugu pisussat piareersimaffiginiarsariaqarivut, assersuutigalugu issittup imartaani aalisagaanngitsut takkuttalissappata massakkullu aalisarneqartartut taarserlugit, taava tamanna piareersimaffiginiartariaqarparput, soorlu aalisariaatsit tungaatigut. Tunngavilersuivoq.

Nunap qeriuaannartup aakkiartornera maluginiarneqareersimammat sanaartugassat eqqarsaatigalugit aamma sillimmartaarfigineqartariaqartoq Kuupik Kleist isumaqarpoq.

- Mittarfiit nunami qeriuaannartumi sanaajupput, taamaattumik sutigut tamatigut sillimmartaartariaqarpugut. Aamma uagut inatsisartutut aalajangiinissat pisariaqartut piareersimaffigisariaqaratsigit. Naalakkersuisut akissuteqaataanni maqaasigisara aamma tassaavoq, suunuku uagut piareersimaffiginiarivut, suunuku pilersaarusiorfiginiarivut, qanoq iliuuseqarsinnaavugut, taamaattumik neriuppunga ullumi oqallinneq kinguneqarumaartoq taamatut suliaqarnissamik aallartitsinermik. Kuupik Kleist oqarpoq.