Kleist: Nunanut allanut tunngasut isumaqatigiissutigineqartariaqarput
Naalakkersuisut siulittaasorisimasaat, Kuupik V. Kleist taama isumaqarpoq. Taamaalilluni taassuma isumaqatigaa, illersornissaq pillugu danskit paasiniaaqqissaarneranni inerniliussaq.
Naak Nunaput Danmarkilu naalagaaffeqatigiikkaluarlutik, namminersuutigisaminnik suleriuseqarnerisa pilersippaat suliarineqartut nunanut allanut tunngasut, nunanit allanit paatsiveerutsitsinerat, Kuupik V. Kleist oqarpoq imalu nangilluni.
- Danmarkip Nunattalu akornanni ukiut ingerlaneranni isumaqatigiissutaasartut tassaasarput, aalajangersimasunik pisoqartillugu isumaqatigiissusiortarneq. Soorlu maanna assersuutitut taaneqarsinnaasoq Pituffimmut suliaq tunngasoq. Taamaattumik nalunaarusiap inerniliussaa isumaqatigaara allammata paatsiveerusimaartoqarsinnaammat oqartussaaffiit qanoq agguataarneqarsimaneri pillugit.
Aamma atuaruk Nalunaarusiaq: Naalagaaffeqatigiinnerup iluani agguataarineq ersarluttoq
Kuupik V. Kleistip taamaalilluni isumaqatigaa, paasiniaaqqissaarnerup kinguneranik nalunaarusiaq, Illersornissaq pillugu Akademimit suliarineqartumi tassanilu allaaserinnittut oqarnerat, Kalaallit Nunaata Danmarkillu akornanni kikkut qanoq suleriuseqassanerannut atatillugu isumaqatigiissinnaannginnermi ataatsimut isummernissaq ungasinneruleriartortoq.
Taamali suleriuseqarneq naliginnaasuusoq, Kuupik V. Kleist isumaqarpoq. Tassami naalagaaffiit akornanni isumaqatigiinniarnerni nunat namminersortutut taaneqartartut isumaat naatsorsuutigineqartarneri annikittuaraasarmata.
Tamanna qaangerneqarsinnaasoq, Kuupik V. Kleist isumaqarpoq, tassami Kalaallit Nunaata Danmarkillu akunnerminni suliassat agguataarneqarnissaat isumaqatigiissutigineqarpata, tamanna kikkunnut tamanut iluaqutaasinnaasoq, Kuupik V. Kleist oqarpoq imalu nangilluni.
- Tamanna nutaamik isumaqatigiissusiuunneqassappat taava nunat tamalaat akornanni oqallisigineqartariaqartutut tamanna uanga isigaara. Tassami Nunatta Danmarkillu akornanni taamaallaat isumaqatigiissusiornissaq naammanngimmat, Kuupik V. Kleist oqarpoq imalu nangilluni.
Læs også Illersornissamut aningaasartuutit ikinnerusut mssingersuutaapput
- Nunarput naalagaaffiunngitsutut, naalagaaffinnut pioreersunut soorlu issittumi naalagaaffinnut isumaqatigiissusiorsinnaanissaa takorlooruminaappoq. Tassami isumaqatigiissusiornerit taamaattut naalagaaffiit akornanni isumaqatigiissutaasarmata. Taamaammallu Danmarkip issittumut tunngatillugu annertunerusumik ilugersuuteqarnissaa imaluunniit annertunerusumik sunniuteqarnissaa isumaqatigaara, Kuupik V. Kleist taama oqarpoq.
