Årets Reumert Klaus Geisler Reumertimik nersornaaserneqarpoq
Isiginnaartitsisartoq 46-nik ukiulik Klaus Geisler, Reumertimik tunniussinermi immikkoortumi "Årets mandlige ensemblerolle"-mi nersornaaserneqarpoq, isiginnaartitsissusiami "Angutivik"-mi isiginnaartitsinini nersorneqaatigalugu. Isiginnaartitsissusiaq "Angutivik", Nunatta Isiginnaartitsisarfiata, Danmarkimilu isiginnaartitsisarfiup Teater freezeProductionsip isiginnaartitsissusiaraat.
”Angutivik” oqaatsit marluiit atorlugit isiginnaagassiaavoq, atuakkiortumit Niviaq Korneliussenimit allataalluni kalaallillu angutip nutaaliaasup ukiuni untritilinni nutaani qanoq ittuunera oqaluttuarineqarpoq. Isiginnaagassiaq nunatsinni siorna angallanneqarpoq, soorlu aamma Danmarkimi Savalimmiunilu takutinneqartoq.
Klaus Geisler, isiginnaartitsisartutut, Nationalteatrets Skuespilskolemi ilinniartut siulliit peqatigalugit 2012-imit 2014-ip tungaanut ilinniarpoq.
Nersornaat Årets Reumert, Bikubenfondenimit aaqqissuunneqarpoq, Danmarkimilu isiginnaartitsisarnermi nersornaasiinerulluni. Nersornaat immikkoortunut 16-inut aggulunneqarsimavoq.
Klaus Geisler, Danmarkimi isiginnaartitsisartut marluk allat, Morten Suurballe Peter Gilsfortilu peqatigalugit Reumertimik nersornaasigassatut innersuunneqarpoq.