Klamydiamut QuickTest-i peerneqalerpoq
Kinguaasiuutitigut nappaatip, klamydiap, inummit namminermit misissorneqapallassinnaaneranut atatillugu atortut misiligutaasinnaasut, Danmarkimi pisiniarfiit ilisiviiniit peerneqassapput. TV2-p aallakaatittagaa, Bastas Research, aallaavigalugu, nakorsaasiorfissuaq, MediGroup, nalunaarpoq, sakkortuumik taama alloriarneq piviusunngortissallugu aalajangiukkitsik.
Nuummili Dronning Ingridip napparsimmavissuani nakorsaq, Gert Mulvad, ilisimatitsivoq, misileraat, QuickTestimik taaneqartartoq, Kalaallit Nunaanni pissarsiarineqarsinnaanngitsoq.
- Taanna maani atunngilarput. Misissuinerit tamarmik laboratooriatsinnukaanneqartarput, Gert Mulvad Radioavisimut oqarpoq.
Matasip Kalaallit Nunaanni pisiniarfiutituarsuani misileraat taanna aamma nioqqutigineqanngilaq, naak Danmarkimi Mataserpassuarni pisiassaasimagaluartoq.
Nakorsaasiorfissuarmili MediGroupimi, pisortaanerup, Thomas Bergip, TV2-p misileraatitsineranut qularpoq, QuickTestimigooq Nakorsaatit pillugit Aqutsisoqarfimmit akuerineqarnikuummat.
Nutaarsiassaqartitsivik Ritzau taama allappoq.
Arnat QuickTestimik pisereersimasut, nalorngissuteqartulli, aningaasartuutigisimasatik utertissinnaavaat. Nakorsaasiorfik MediGroup naapertorlugu, Matas nakorsaataarniarfiillu QuickTest nioqqutigisimavaat.