Klamydiamut katsorsaatit tuniniarneqartartut

Tamanna unioqqutitsineruvoq, minnerunngitsumillu kinguaassiuutitigut nappaatip akiorniarneqarneranut peqqinnissaqarfiup sulinera ilungersunartorsiortinneqarluni.

- Iisartakkanik amerlasuunik pisisoqartarnera tuniniarneqartarnerilu Nuummi nakorsiartarfimmit ilisimaneqarpoq, Nuummi nakorsiartarfimmi pisortaq Jesper Olesen oqarpoq.

Klamydiamik tunillatsissimallutik nakorsiartut arlaleriarlutik nassuerutigaat, iisartakkanik katsorsaatinik nittartakkakkut pisisimallutik, taakkualu aallaavigalugit Nuummi nakorsiartarfiup pisortaata unioqqutitsilluni iisartakkanik tuniniaasoqartarsinnaanera ilimagivaa.

- Iisartakkanik sinnilinnik nittartakkakkut pisisoqartarsimanissaa ilimagivarput, Jesper Olesen oqarpoq.

Klamydiamut katsorsartinniaraanni iisartakkat marluk pisariaqartinneqarput.

Qarasaasiakkut nittartakkami iisartakkanik katsorsaatinik ujaasinermi, iisartakkat 30-it 455 koruuninik akeqartut ingerlaannaq nassaarineqarsinnaapput. Taakkua klamydiamik nappaateqartunut 15-nut katsorsaataasinnaapput, iisartakkat marluk 30 koruuninik akeqarlutik.

Nuummi nakorsiartarfiup pisortaata oqaluttuaraa nakorsiartunit tusarsimallugu iisartakkat marluk 500 koruunilerlugit tunineqartartut, taakkualu unioqqutitsilluni tunineqartartut. Veneriani iisartakkanik pilluni katsorsartikkaanni akeqanngitsoq.

Inuit ilaasa 500 koruuninik akiliillutik iisartakkanik pisisarnerat Nuummi nakorsiartarfiup pisortaata Jesper S. Olesenip isumassaqartinngilaa, taannali isumaqarpoq venerialiarnissaq pillugu inooqatigisamut nassuiaateqarnissap ajornakusoortinneqarnera takorloorneqarsinnaasoq:

- Tamannalu immaqa pinngitsoorniarlugu 500 koruuninik akiliilluni katsorsartinnissaq toqqarneqartarpoq, Jesper Olesen oqarpoq.

Nittartakkakkut iisartakkanik pisisarneq ilaatigut allanik patsiseqarsinnaasoq Jesper Olesen isumaqarpoq.

- Angutit klamydiamik tunillatsissimasut vatpindi atorlugu quup aqqutaatigut mississortinnissartik merserisarpaat, tamannalu nassueritigisinnaavarput. Kinguaassiuutitigut nappaammik tunillatsissimasut tunillatsissimasorisullu misissortinnissaannut tatiginninnermik toqqissisimanermillu pilersitseqqinnissarput pingaaruteqarnerpaavoq, Jesper Olesen oqarpoq, nangillunilu:

- Taamaaliornikkummi paasineqassammat kina kinguaassiuutigut nappaamik tunillaassuuttumik nappaateqarnersoq.

Kinguaassiuutitigut nappaammik klamydiamik tunillatsissimasut misissorneqartarnerat allanngortinneqarpoq.

- Angutit arnallu quutik veneriamut tunniussinnaavaat ullut marluk pingasulluunniit qaangiukkaangata paasisinnaallugu klamydiamik tunillatsissimanerlutik, Nuummi nakorsiartarfimmi pisortaq Jesper Olesen oqarpoq.

Nunatta nakorsaataasiviani ningiup Inge Mortensenip erseqqissarpaa, iisartakkat nakorsaatillu nunanit allanit, aammalu qarasaasiakkut pisiat Kalaallit Nunaannut eqqunneqartarnerat unioqqutitsinerusoq.

Kalaallit Nunaanni nakorsaatit pillugit inatsit ukiut tallimat matuma siornatigut atuutilersoq malillugu iisartakkanik nakorsaatinillu Kalaallit Nunaannut eqqussineq inerteqqutaavoq.