Kjell Mikkelsen ukiuni arlalinni Kalaallit Nunaanniissimavoq.

Kjell Mikkelsenip Kalaallit Nunaanniinnermini misigisaqarsimaqaaq - inuttut nipilersornikkullu.

Kalaallit Nunaanniinnermini misigisartakkani Kjell Mikkelsenip ima oqaatigaa:

- Kalaallit Nunaanni najugaqalerama ilisarisimasarpassuaqalerpunga, taakku ilaagaat arnaq ataaseq maanna ukiuni 37-ni aappara, marluullutalu maanna inersimasunngorsimasunik meeraqarpugut. Inuuninni nuannernerpaat misiginikuusakka Kalaallit Nunaanni misiginikuuakka. Kjell Mikkelsen oqarpoq.

Taanna ukiut 21-t Nunatsinni najugaqarsimavoq, 1995-imilu ilaquttani ilagalugit Danmarkimut nuussimallutik. Nunatsinneeqqaalerami Pituffimmi sulisuusimavoq, Kangerlussuarmi aamma najugaqarsimalluni sivisunerpaamillu Nuummi najugaqarsimalluni.

Kjell Mikkelsen danskit aviisa ilaannit apersorneqariitsiartorlu, Radioaviisimit oqaloqatigaarput, ullup ingerlanerani DR-ip aallakaatittagaanut Aftenshowimut peqataaniarluni Kjell Mikkelsen aamma oqaatigaa.

Kalaallit Nunaanni nipilersortartutut inuunermini ilikkagaqarsimaqaaq. Tamannalu ima oqaluttuaraa:

- Kalaallit Nunaannut tikeqqaarama nipilersortartutut atorfeqarpunga, Hotel Godthåbimi, Kalistiinaaqqami Hotel Grønlandimilu nipilersortarlunga.

Maniitsumi Qaqortumilu nipilersortarsimalluni Kjell Mikkelsenip aamma oqaatigaa.

Ulluni kingullerni Kjellip oqarasuaataa sianeqattaaginnavissimavoq, kikkummi tamarmik oqaluukkusuppaat.

X-Factorimut peqataanini nuannaralugu oqarpoq.

- X-Factorimut peqataalluni nuanneqaaq, ingerlaqqissaguma ingerlaqqissanngikkumaluunniit ajorinngilara, tassami suliffiga paarisassaraara, siunissamilu suliffigiinnarnissaa naatsorsuutigaara.

Kjell Mikkelsenip nulia Anne Sofia, X-Factori tv-kkut takutinneqarmat peqataasoq oqarpoq, uini Kjell tv-kkut takullugu nuannertoq.

- Nuanneqaaq, uanga nuannareqaara, Anne Sofia oqarpoq, Kjellip nipilersorneq nuannarilluartuugaa.

- Kjellip nipilersorneq qanga inuussutiginikuugamiuk nuannarisorujussuuaa.

Anne-Sofia aamma oqarpoq, Kjellip Kalaallit Nunaat maqaasisaraa.

- Aap, Kjelli ukiuni 20-ni Kalaallit Nunaaniinnikuuvoq, maqaasisarpaa assut

Ullut kingulliitt marluk ingerlanerinnaani, Kjell internetsikkut nuannarineqarlualersimavoq. Inuit tusind-it arlaqartut nuannaralugu Facebookikkut taasisimapput. Ualingaa Facebookkimi Kjell 4000-nik nuannarinnitseqalersimavoq.