Kivitseqataarusuttut amerlaqaat
Sunngiffimmi suliassaasinnaasut innuttaasuniit namminneq, ingammik inuusuttunit, ujartorneqartalersut malunnarsiartuinnalersoq, sisamanngornerit tamaasa nalunaaqutaq quliniit aallakaatinneqartartumi oqaliffimmi oqalliseqataasut nalilerpaat.
Taakku naliliinerminni aallaavigaat arctic wintergamesip ingerlanneqarnissaanik ingerlatsisut ullut marluk isumasioqatigiissitsinerani. Nammineq kajumigalugu sulineq nunatsinni uummaarittuusoq isumasioqatigiit nalilersorpaat, taamaammallu kajumigalugu sulerusuttunut saaffiginniffiusinnaasumik ujartuisoqarpoq, soorlu nittartagaliortoqarsinnaasoq kikkulluunniit ujarlerfigisinnaasaat, nunatsinni sumiiffinni assigiinngitsuni saaffiginniffiusinnaasut kikkut sulerinerinik allattorsimaffik.
Nittartagaliortoqarnissaanik ujartuinerup tunngavigaa, innuttaasut akornanni nammineq kajumigalugu suleqataarusuttut amerliartuinnavimmata. Kommunit sunngiffimmi suliaqartitsisarnerisa periaasiat isorinianngikkaluarlugu, periarfissatigut amigaateqalersimasoq isumasioqatigiit naliligaat, oqalliffimmi oqalliseqataasut oqariartuutigaat. CSR atorlugu suliffeqarfiit nunatsinniittut sulisuminnut kaammattuinerunissaat aamma isumasioqatigiinnit kissaatit ilagigaat, oqalliffimmi oqallittut oqaatigaat, sulilu suliffeqarfiit nammineq kajumigalugu nittarsaanerusariaqaraat isumaqarfigineqartoq.
Aamma tusaajuk: Oqalliffik 24.09.2015
Naak nammineq kajumigalugu suleqataasartut amerlagaluartut, inuusuttut 29 procentii kaammattugassaasut misisissuisoqarnerani erserpoq, inuusuttut akornanni 21 procentii nammineq kajumigalugu sulinissamut piareersimasut aamma misissuinermi ilisimaneqalereersimavoq. Nammineq kajumigalugu sulisarnerup annerusumik nittarsaanniarlugu suliniarneq kivitsisa 2016 facebookimi aamma nassaarineqarsinnaavoq.
